星幕 - 驚喜的半自助

食物：$$$$
環境：$$$$
服務：$$$$

Happy Friday, 晚上當然就要大吃大喝，及時行樂。

有人報料，毗鄰將軍澳港鐵站的九龍東帝苑酒店，頂樓既Cielo，做緊半自助餐，幾抵食咁話。

既然係咁，又去試試喇~

常說家陣餐飲市道低迷，估唔到呢度竟然爆場，好彩朋友醒目有留位。

做Semi Buffet，自助餐桌上的款式就自然唔會話超級多，但基本的沙律菜、Cold Cut都有供應，仲有一碟碟的小吃放得靚靚仔仔，鴨胸唔會韌，蝦丸彈牙，蜆肉新鮮，明太子玉子燒一向是我的至愛，質素蠻不俗。

半自助餐會跟上餐湯，是晚的就係南瓜湯，有夠濃郁，沒有投訴。

主菜四揀一，據店員說會定期轉款，以保持新鮮感。作為牛魔王既筆者，自會選擇澳洲牛柳。質感軟腍，做到要求的生熟程度，沾上惹味但不過辣的黑椒汁，及芥末，收貨。旁邊的青紅椒及薯角等也砌得靚仔，沒有馬虎。

試了些朋友的卡邦尼意粉，頂頭盪漾的雞蛋最吸睛。將雞蛋破開，任由蛋汁滲進意粉的每一吋，是我們的慣常操作。煙肉、忌廉等混合起來，味道是好，用上較幼身的意粉，與平時食開的卡邦尼，感覺有點不一樣。

甜品也是自助，愛健康的朋友猛烈進攻水果，拿破崙素來是酒店的招牌，自當不能錯過。再吃些奶凍、泡芙等，已經非常滿足。

半自助餐仲包埋紅、白或汽泡酒，以及咖啡或茶，好圓滿。

$428的價錢，網上訂座的話，平日更有八折，週末就是八五折，吃得過吧～

餐廳資料:
星幕
將軍澳唐德街3號九龍東帝苑酒店47樓
39830638