食物：$$$$
環境：$$$$
服務：$$$$
萬麗海景酒店的自助餐向來備受老饕推崇，然而強者從來都會不斷力求進步，呢度亦來個大變身，成為全新餐飲概念的Food Studio。
新裝潢，地方更大，嘢食選擇更豐富和有特色。餐廳之設計靈感源自灣仔的天星小輪與電車，非常有親切感。行出去兜個圈，最吸睛的毫無疑問就是那氣勢磅礴之冰鎮海鮮山，龍蝦、鱈場蟹腳、蜆、青口、翡翠螺等等應有盡有，真係睇見都開心。各式凍海鮮都好新鮮，個人尤其喜歡爆羔的麵包蟹及龍蝦。講起龍蝦，萬麗海景既蒸活龍蝦從來是招牌，新裝後當然亦保留番，肉嫩多羔，龍蝦鉗更是甜美，稱得上是自助餐桌上數一數二的高水準。這裡的自助餐概念，著重互動，在好多美食都是即席烹調，包括香噴噴的烤大虎蝦。新鮮熱辣的拿回去，成品自然是彈牙味鮮，蟹頭多羔好吃。
另一重點項目，要說到由海膽結合魚子醬的紫菜塔可 (Taco)，呢個組合，有人會不愛嗎? 除了這日式的塔可，其餘的刺身都十分誘人，牡丹蝦更是當中的焦點。這兒另一款的海膽美食，正是海膽意大利飯。同樣是即場製作，意大利飯加埋海膽，鮮上加鮮，記緊要熱食呀！今時今日的自助餐，真係要出盡法寶，昔日普通的粉麵檔，家陣都要做得奢華有水準，譬如呢度既龍蝦喇沙，湯底以自助餐而言是超晒班，再轟半隻波士頓龍蝦落去，愛星馬菜既筆者滿足到極點。烤牛肉或者火腿，在很多酒店自助餐都會遇到，然而原隻的烤乳豬就真的不多見。師傅即席切開，咔嚓的聲音已說明一切。皮脆肉嫩帶咸香，兩件都唔多夠喉。再講，其實燒牛肉都好得，我同樣吞下了兩塊。其他精彩的食物包括豉汁蒸鱔，同埋湯品。呢度既湯水真心正，三款包括中式的蟹肉冬蓉羹，法式既洋蔥湯，以及燉螺頭都好值得品嚐。當然唔會走漏燒味，叉燒、燒鴨及油雞，滿足我三個願望。熱葷再每樣吃一點，肚皮幾乎要爆開。幸而，吃甜從來是另一個胃。這兒的甜品可說是以蛋糕為主打，由清新的菠蘿檸檬椰子蛋糕，到華麗的紅絲絨，以至重口味的芝士蛋糕及布朗尼，同埋提拉米蘇都一應俱全。蛋糕控既我表示開心。其他的甜點如開心果泡芙、林明頓、即叫即做的橙酒班戟，以至四款口味的意大利雪糕，全部合我心水。飽到要飲番杯伯爵茶來消消滯~
沒有留言:
張貼留言