久両菜 - 型格潮食

食物：$$$$
環境：$$$$
服務：$$$$ 

活化後的中環街市，成為半個年青人的聚腳點，我卻總覺得成個場欠缺了一間型格的中餐。

近日終於打破悶局，出現了一家潮州菜館，叫久両菜。名字過癮，裝潢有個性，相信年青人會受落。

感覺是昔日東寶小館 (未去過東寶新店) 與楚撚記的混合體，筆者幾有興趣。

吃潮州菜，固然要大擦鹵水嘢，有理無理先整幾碟，鵝片豬耳大腸生腸墨魚乜乜乜，樣樣都有，才夠暢快。

估唔到雖然是新店，鹵水膽又做得幾好，醇香夠味，令我對往後的食物更有期待。

眾多鹵水食物當中，有幾款特別合我心，包括邪惡的豬大腸及鵝腸，前者甘香，後者爽脆不韌，充滿脂香。鵝掌翼超入味要大推，豬頭肉也好，鵝肝是永遠都討我歡心的食品。仲有仲有，墊底既豆腐，索盡鹵水的精華，從不是配角。

煎蠔烙只要足料夠香，就岩我口胃，這兒就做到了。

打冷就是要吃魚飯，來一條凍烏頭試試。呢度既烏頭是走嫩滑路線，沾一下普寧豆醬，不錯。吃至此時，大家都叫了潮州粥來，我也嚐了小半碗，滿足。

以高水準的反沙芋作結，今餐簡簡單單，麻麻甩甩，好岩我口胃。

仲有好多餸我都想食，可惜胃納太有限，下次班齊人馬再戰。

餐廳資料:
久両菜
中環皇后大道中93號中環街市1樓124-125號舖
21171919