又到左不定期聚會的日子，一班人就費事諗咁多，食自助餐最實際，無需顧及大家的口味。
況且，今次去朗廷酒店的The Food Gallery，正做緊蟹既主題，當然還配撘大量海鮮，所以好放心各位一定岩食。
選擇一如以往的豐富，慵懶既筆者不會逐項介紹，只說重點。凍海鮮有齊鮑魚、海蝦、青口及蜆及龍蝦鉗等，而既然是以蟹為主角，表現的確特別出色，雪場蟹腳多肉又鮮甜，麵包蟹超級爆羔。熱葷以薑蔥炒蟹最為吸引，打開餐盤蓋，香氣撲鼻，有夠惹味。另外的海鮮，咸菜蒸盲鰽魚柳這配撘幾特別，香口既炸鳳尾蝦肯定岩我，蒜蓉辣椒涼拌白蜆麻香怡人。戴番個頭盔，佢哋既熱食係會輪流供應，當你見唔到有薑蔥炒蟹，可能係變左新加坡辣椒蟹，絕對唔出奇。呢度既酥皮類及焗既美食都唔少，焗磨菇蟹肉批最徹合主題，仲有如酥皮焗干邑龍蝦湯，西班牙紅蝦配墨魚多士等。好多自助餐的燒味於筆者而言是可有可無，不過這裡的就是每次我都會留肚食。豉油雞、白切雞、叉燒等，仲有必吃的燒腩仔，皮脆卜卜，腩肉層次分明，好吃。當然不能錯過現煮及烤肉區域，是次的蒜蓉粉絲蒸龍蝦，火候控制幾好，肉質唔會韌，結合惹味的蒜蓉粉絲，我吃了一整隻。
食肉獸既朋友是夜可大聲歡呼，皆因有超巨型的燒斧頭扒，肉味濃香，一件唔會夠喉。來過幾次，不論做什麼主題，總會遇上牛肝菌松露威靈頓牛柳。相信大家都知道，此味最難控制的，就是火候。但在這大可放心，我吃過咁多遍，沒一次失手，再看看今次牛柳的嫩紅色澤，已知會是相當吸引。粉麵檔今期做我大愛的越南番茄蟹羔湯米，又貪心又細食既我，唯有一碗跟朋友分甘同味。千層蛋撻早已是這裡的招牌甜品，絕對不可錯過。香甜的蛋漿，酥脆有層次的撻皮，每次起碼兩件才收手，依家講起又再口水流。
還有一系列的甜點選擇，如鬼佬油炸鬼、梳乎厘班戟等。原個蛋糕則有永遠高水準的巴斯克芝士，今期很突出的Paris Brest，還有滿滿兒時回憶的黑森林蛋糕。其實，嚐幾口蛋糕，再來幾球Movenpick雪糕，呷口咖啡，已是非常圓滿的終結。講起飲品，除左咖啡茶及汽水等任飲外，竟被我們發現汽泡茶也是無限量供應，我喝了兩枝！ 一以既往，大家都是盡興而歸。
餐廳資料:
The Food Gallery
尖沙咀北京道8號香港朗廷酒店大堂
21327898
沒有留言:
張貼留言