食物：$$$1/2
環境：$$$$
服務：$$$1/2
我份人其實都幾悶蛋，週末最佳節目，大概就是跟朋友找個舒適的地方吃早午餐，悠悠然地渡過。
如果講靚景早午餐，位處七號碼頭的Watermark，絕對在列。最近佢有新Menu，又同大家去歎下。
個人認為，一心來享受悠閒的早午餐，Free Flow是不能吝嗇的。嗜酒的，加$290，紅白汽酒甚至雞尾酒啤酒暢快痛飲；不喝酒的朋友，只是$60，果汁汽水青檸梳打等非酒精飲品都是任飲，好容易回本。頭盤十一款，全部有齊，唔使選擇，當中有健康的有邪惡的，迎合不同口味之人士。喜歡的款式更可再添加，好誇張。以貝殼作盛器的，有淺漬油甘魚、帶子慕絲及烤一夜干魷魚。前兩者清新可口，後者爽脆不韌，我哋全部都有追加，質素可想而知。健康/蔬菜類選擇亦有唔少，迷你羅馬生菜沙律是大家一致讚賞，烤榔菜花及長柄西蘭花都恰如其分，有人鍾情於開心果鷹咀豆蓉，酸種麵包配紫菜牛油都好吃得要「安哥」，結論係總有幾款岩你心意。邪惡之選，必要數到烤豬腩肉，肥瘦有致，惹味又唔會太硬轟轟，的確好吃。主菜則可揀一樣，我哋當然就是選不同的，再大家分甘同味。烤原隻波士頓龍蝦是我的選擇，西京味噌調味幾岩我，龍蝦肉嫩，連埋三文魚子食口感更豐富。龍蝦鉗自然更鮮嫩甜美。
有兩款牛肉菜式，分別是燴牛面頰肉，以及M7和牛後腰脊，都被我們點了。兩款都唔差，但硬要秤高低的話，我會更喜歡後者，簡簡單單，只是火侯控制得宜，就已很好。旁邊的法式薯批其實都有加分既。法國黃油雞賣相也不花巧，煎至皮香肉不嚡口，伴以羽衣甘藍及煙肉薯蓉墊底，同樣吸引。鮑魚燴飯及松葉蟹意麵，前者混入了薏米，成件事好健康；後者則是大家見慣見熟的番茄蟹肉意粉，勝在開胃。甜品係大大碟的拼盤，中間的那份並不是提拉米蘇，而是香蕉蛋糕，反而旁邊綠色的，才是抹茶提拉米蘇，有啲估佢唔到。馬卡龍配咖啡就最適合了。任何日子，任何時候，一杯黑咖啡，是錯不了的。在如斯美景下享受早午餐，三小時真係轉瞬間便會過去。
沒有留言:
張貼留言