龍逸軒 - 豐盛商務午餐

食物：$$$1/2
環境：$$$$
服務：$$$$ 

其實幾中意飲茶食點心，慶幸年中總有唔少機會，食到優質的商務午餐，包括呢一餐。

是日嚐到的午市商務套餐，內容非常豐富，好在之後不用回公司扮工，否則肯定飯氣攻心，要與睡魔搏命。

事不宜遲，打頭陣的拼盤，叉燒厚切，但仍保持鬆化。香辣脆金磚，係外脆內嫩的炸豆腐，辣勁並不很強。薄片的肴肉晶瑩不硬，與尖椒皮蛋味道皆不俗。

三款點心是蝦餃、燒賣及咸水角的傳統嘢，但咁樣奉上又即時高檔左。燒賣飽滿企身，蝦餃形狀靚又足料，兩者都是比較大粒的。咸水角做成啤梨般，咬落香脆煙韌又散發出蝦米香，平凡中見真章。

商務午餐必有湯水，清保涼健脾益胃，對於缺乏休息的我最為合用。

再來的蟲草花蒸斑球，魚肉厚身卻仍保持嫩滑，跟蟲草花也從來合拍。

櫻花蝦的香氣與質感，跟爽脆的芥蘭都好夾，比起薑汁炒，多一份層次，我喜歡。

鮑魚炆麵，用上的自然是粗麵，勝在沒有惱人的鹼水味，鮑魚亦軟腍入味，係好穩陣既商務餐的選擇。

甜品有齊中西兩款，先是生磨芝麻糊，忘了多久沒吃過這糖水了。濃香的芝麻糊，令我想起兒時用擔挑上樓賣芝麻糊的伯伯，好多回憶返番嚟。

西式甜點，芒果拿破崙，鬆脆有層次，呢個酒店集團的拿破崙一向有一定保證。

師傅既基本功幾扎實，後來知道原來是從昔日桃花源出來的，難怪。咁要搵次試試佢既蛇羹喇！

餐廳資料:
龍逸軒
尖沙咀彌敦道19-21號九龍酒店2樓
27343722