2022年6月27日 星期一

發仔記 - 海鮮大餐



食物:$$$1/2
環境:$$$
服務:$$$$ 

話說上次跟地膽朋友去鴨脷洲食嘢,先去佢相熟既檔口買平靚正既海鮮,再俾樓上既珠記加工,非常之正。今次繼續跟佢搵食,同樣係先去買又平又靚海鮮,不過就改去對面個間發仔記開餐。

其實發仔記本身都有唔少菜色,包括海鮮,所以大家唔一定要好似我哋咁係街市買俾佢加工。

係街市度買左幾樣嘢,每人兩隻蟶子,厚肉爽脆,豉椒炒,夠惹味,蟶子也鮮甜。汁醬千祈味浪費,加多個米粉底,吸晒啲精華,很不錯。

見啲桶蠔好平,又買一桶。美國同埋台山兩款,無理由唔食美國架啫。請師傅整個薑蔥炒蠔。蠔本身唔算超巨大,不過隻隻漲卜卜,肥美肉嫩,毫無腥味,熱呼呼的送上來,又係惹味好吃。

仲有每人兩隻的貴妃蚌,呢個就蒜茸粉絲蒸喇。味道鮮美,蒜茸推得好香,加埋蔥花配粉絲,又係食唔停口。

見店鋪門口有生猛既琵琶蝦,有人嚷著要吃,我當然樂意奉陪到底。好貨色,清蒸就最合適。肉質鮮嫩,一滴豉油都唔使點,原汁原味真好吃。

呢類地方既椒鹽鮮魷,其實都幾有保証。外層鬆脆,魷魚唔怕韌得像吃擦字膠,爽脆彈牙,本身已經幾好食。沾些少酸咪咪的汁醬,好開胃。

最後要番個菜平衡下,蒜茸白菜仔份量蠻多,學斗白菜仔又嫩又軟腍,很好吃。

有人諗住先俾現金埋單,但原來自己唔夠錢,老闆竟然話由得佢,下次先俾。呢啲人情味連鎖店就無辦法搵到。當然我哋最後都湊夠現金找數。


餐廳資料:
發仔記
鴨脷洲鴨脷洲大街80A號地舖
61311556

4 則留言: