飲茶 - 飲茶食包慢慢傾

食物：$$$1/2
環境：$$$$
服務：$$$$ 

可愛造型既點心，在相機食先年代，自然有生存空間。

Yum Cha，算是較早期以卡通點心為主打的店子，其睇住流奶、蝦靈入眼等出品，數年前曾一度在我的Facebook洗版。

只是，我到今時今日，才首次親身體驗呢個品牌。

一開波，當然是向住特色點心進發。以雀籠做器皿的鴿吞鳳梨，做得細緻，將鳳梨酥變成這個樣子，又保留到酥脆口感，自然受大眾歡迎。

一籠八戒，即是可愛豬頭造型的叉燒包。味道正常，不過對於食古不化的筆者而言，還是傳統的裂口叉燒包最令我動容。

蝦餃做成粉紅色，好像矜貴些。只是澄麵皮染上顏色，對本身的食味其實沒有什麼影響，只要像這兒的出品，餡料夠充足，就會比傳統更吸引。

點心以外，也要份小吃試試? 白鹵水豬手，加埋泰式的甜酸汁，多一份醒胃感覺。

這個時節，店家亦唔執輸，推介蟹粉菜色。鬆脆的蝦多士食得多，跟上蟹粉倒是首次見識，又其實，蟹粉配脆多士，理應合拍。另外一款，係蟹粉蝦仁豆腐，把家常的蝦仁豆腐菜色，添一份邪惡感。

啫啫芥蘭做得十分香口，翠綠之芥蘭質感爽脆，加埋大大隻蝦乾，好惹味，若然可以少丁點油，就更理想。

隨之而來的荔芋腊味煲，散發陣陣椰香，芋頭以外，還混入了腊腸潤腸及冬菇等，呢個時節食岩晒合尺。

怕大胃王唔夠喉，來個炒飯比較穩陣。貌似西炒飯的東西，查實係海膽炒飯，勝在炒得乾身，份量又好足，大胃王都話夠飽。

香港地真係好怪，中午繁忙時間爆到七彩，兩點後大家速逃。

餐廳資料:
飲茶
中環德輔道中173號南豐大廈2樓1-2號舖
37088081