自家醃蘿蔔

近排係Fb/ Blog見到好多自家煮食物相，一些朋友弄鹵水汁，又有整醉酒汁，甚至Sangria都有，大家似乎玩得好開心。

心想，不如我又浸/ 醃啲嘢? 但...... 搞什麼好呢?

靈機一閃，反正屋企有白蘿蔔，不如就醃蘿蔔?!

是的，以前去永華或劉森記食麵，某程度上係為左佢哋樽醃蘿蔔而去。

           

材料好簡單，白蘿蔔、粗鹽、冰糖及米醋。

先將白蘿蔔刨皮及切粒，用粗鹽醃大約一句鐘，待蘿蔔出水，把水份倒去，用清水沖洗乾淨備用。

與此同時，用一整樽的米醋 (500ML)，把冰糖以慢火煮溶，我用晒成包冰糖。

最後，以糖醋浸泡白蘿蔔，放入雪櫃醃一至兩天便可。屋企剛巧有隻已放到巢晒皮既指天椒，放埋入去吧。

放雪櫃可保存約一個月啦！

我，搵左隻白老鼠幫手試味~

小秘訣：

• 喜歡吃辣的朋友，可加入切粒的指天椒；愛清爽的朋友則可放幾匙柚子醬
• 可以白砂糖取代冰糖
• 坊間米醋五花八門，酸度由5% - 9%不等，建議煮好糖醋後試過味才醃蘿蔔
• 醃紅蘿蔔同樣可以 (但個人不是太喜歡其口感)