Bistro on the Mile - 聖誕自肋餐

食物：$$$1/2

環境：$$$$

服務：$$$$

聖誕節食自助餐，相信是許多人的習慣，也是我細由到大的諗法。

眨下眼又就快聖誕，大家訂左位/有無心水去邊食Buffet？若然仲未決定，或者我之前介紹的都唔岩心水，可以留意下今篇，金域假日酒店的聖誕自助餐，可能令你鍾情都未定。

   

一開波梗係先食沙律和凍海鮮(雖然我有時會反過來先吃甜品)，餐廳也將這個區域佈置得充滿聖誕氣氛。沙律款式蠻豐富，凍蝦、藍青口、蟹腳，以及龍蝦等好搶手，尤其是凍龍蝦，多羔，肉質甜美，不會韌得像吃橡皮筋咁般。

最受香港人歡迎的，肯定是即開生蠔，來自美國產地。年紀唔細既筆者，食力不復當年，唔可能再一打一打咁食，三隻已經好足夠。

作為食肉獸，自會留意有咩靚肉食。應節的如聖誕火雞、威靈頓牛等，相信可滿足要有啖啖肉的大家。個人還很喜歡蜜糖燒汁火腿，是佳節食品的必然之選。

素來愛吃香口嘢既我，面對住邪惡多羔的炸軟殼蟹，係無乜抗拒能力的。

西班牙海鮮飯勝在材料豐富，其他的熱食我較為欣賞蒜茸粉絲蒸扇貝，同埋薑蔥炒龍蝦。或者年紀大左，會喜歡吃中式食品多一些。

仲有一樣我鍾意的，都係中式美食，無錯就是片皮鴨，食一件唔夠喉，需要Encore，好友甜魔媽媽更吞下了八件之多，水準可想而知。

每人會有一盅燉湯，是夜喝到的，係花膠燉雞湯，感覺清潤，女士們大概會很受落。

一系列的聖誕甜品，賣相好誘人，每樣都想吃。德國聖誕果子麵包是怎樣也要食少少的，朱古力樹頭蛋糕精緻得令人捨不得吃，仲有聖誕布甸等等，甜胃絕對沒有投訴。

最後，有鐵版炒果味卷伴雪糕，士多啤梨口味的炒雪糕再配哈根大師的朱古力味雪糕，雙重享受。講起雪糕，千萬不能錯過12月的別注版Creme Cheese口味，否則我肯定你會後悔莫及。

再次再次預祝大家聖誕快樂！

餐廳資料:
Bistro on the Mile
尖沙咀彌敦道50號金域假日酒店1樓
23151118