虎沙燒鵝專門店 - 獎勵自己，食雙髀~

食物：$$$1/2
環境：$$$
服務：$$$1/2

位置吊腳的虎沙燒鵝，正常人唔會專程前來，所以老闆娘也說，呢度唔會賺到大錢，搵到份糧已經算偷笑。

筆者又點會唔知做飲食既苦況，我可能比老闆娘更加清楚。

星期天，繼續是例行運動，在開波之前，獨自在這裡食個午餐，儲夠力氣最實際。

 

雙髀

瞄一眼餐牌，好快已作出了決定，雙髀飯是也，要碟頭上。

肉嫩

 

又犯了老毛病，忘記兩隻髀要免切，當飯餸奉上來時，已後悔莫及。先吃白切雞，估佢唔到咁皮爽肉嫩滑，幾得。今時今日，在香港地食雞，也真不要求雞有雞味。這原本是笑話，依家變成事實，認真可悲。
 

甘香

另一邊的燒鵝髀，咬下去皮確是脆，鵝肉嫩而味甘香，比一些著名的專門店，更勝一籌。
 

呢碟先係好嘢

附上的小碟薑茸，才是極品。我不會用來沾雞肉，而是拿來撈飯，三兩下手勢，便已可以清碟。
 

要再來

邊飲住檸檬茶，邊聽鄰桌好似好識食的客人大讚這兒的叉燒與燒肉，又話燒肉既皮脆卜卜，肉咸香。又話叉燒鬆化甜美，直頭可稱皇。咁巴閉，看來要再來多一次，睇下係咪真係咁正先~

食飽飽

充滿能量的去打波，結果都係要輸~ 哈哈哈哈！

餐廳資料:
虎沙燒鵝專門店
長沙灣東沙島街171-175號
5579 7801