聯邦郵輪宴會中心 - 只欠藍天與白雲

食物：$$$1/2

環境：$$$$

服務：$$$1/2

聯邦集團，給各位的印象，可能會是大眾化的連鎖中式酒樓，食物平平無奇。

然而，集團旗下在郵輪碼頭的宴會中心，又唔一樣，因為這裡的廚師團隊，高幾班。

樓底好高

喜歡呢度既樓底夠高，裝修唔錯，仲有海景，而且環境清靜，是個舒適的好地方。交通是最大問題，不過如果自己駕車，又無咩所謂啦！

 

大大粒

劃幾個點心先。飲茶食蝦餃，好像是必然的事。屬大大隻的出品，型狀合格，摺得幾好，澄麵皮有丁點黏牙，但蝦肉就真係俾到足，吃完兩隻，都飽緊一截。

 

未見合心

呢度既點心，應算是較新派，雞扎並不是以腐皮包裹，坦白說，不是我杯茶。加之，雞肉有少許韌，炸肚是可以，但以雞柳去取締火腿，我又不是太喜歡。

 

坊間實在太多鮑魚酥

現時已經愈來愈多地方有鮑魚撻/酥吃，而且變化也開始多，並唔係間間都係鮑魚雞粒，如麗思卡爾頓酒店的天龍軒，就供應鮑魚燒鵝酥。而這兒的，則是葡汁鮑魚撻。鬆化的撻皮，配上葡汁及鮑粒、蘿蔔粒等的材料，頂頭置原隻迷你鮑魚，無疑是惹味，但也真的有點點膩。

 

三拼

想試試燒味，貪心一點，來個三拼，有海蜇花、叉燒，與及鴨舌。海蜇花的確爽脆，叉燒亦沒有太硬，鴨吞以香辣的川醬伴過，帶點刺激，味道是可以，但我覺得仍未夠軟腍。

 

好食呀!

當然再要嚐「廚房嘢」。難得這邊有拔絲咕嚕肉，又怎可能錯過。脆脆的外層，內裡則鬆化，酸甜度平衡得宜，很合心。墊底的桃，最開胃，比起菠蘿，我更喜歡。

 

招牌

仲有款招牌菜，係大蝦拱麵。小小的全蛋麵球，頂頂加隻大蝦，有氣勢。研究這大蝦怎可咁穩陣置頂，原來麵球上是有個洞，考妙。麵咬落爽脆，以為是加入了蟹黃，原來全是蛋白，只是加了甘筍汁去弄成的樣子，有心思，也可口，難怪成為店家的大熱菜色。

 

比預期中好喎!

最後，點了桂花糕，同埋香甜富蛋香的焦糖燉蛋，慰藉甜胃。

可惜，這天下著雨，欠缺了藍天與白雲。

餐廳資料:

聯邦郵輪宴會中心

九龍灣承豐道33號啟德郵輪碼頭2樓B區 N205及N206號舖

2626 0033