食物：$$$$
環境：$$$$
服務：$$$$
又一場的團年飯，今餐係同屋企人過節，一行十人，有老有嫩。
為方便大家，地點揀在中間位的又一城，上海菜一向係我哋喜歡的。其實去年中秋，我哋都係係呢度做節。
十二人餐對我們來說是太過豐富了，所以只點上半圍的，另外再加些大家想吃的，已十分足夠，甚至要打包。
人齊食飯！打頭陣的淮揚五福拼盤，有醉雞、烤夫、涼拌海蜇皮、肴玉，以及燻魚，數款冷盤之中，個人對軟熟又入味的烤夫最有好感，而最令人失望的是醉雞，甩皮甩骨。清炒河蝦仁是筆者素來都喜歡的菜式之一，必定要用上細細隻的河蝦，才能做到那爽身清甜的滬式風味。有些人會偏好龍井炒，個人而言，清炒已好合心。套餐自會有湯水，砂鍋雲吞雞，勝在湯頭夠熱，又夠濃香，厚皮的上海雲吞，從來是配角而已。由於是六人份的套餐，松鼠桂魚也是比較細條，然而佢亦做到香脆，酸甜平衡恰好，沒什麼投訴。套餐有百葉結紅燒肉，但我仍私心再點了元蹄。皮豐厚，膠質豐富，肉質亦唔怕韌，夠晒入味。呢隻元蹄，我非常欣賞。
套餐的半隻煙燻脆皮雞，無疑是皮脆肉嫩，但煙燻味卻不太突出，當是粵菜的炸子雞就好。
老媽子加了份蟹粉豆腐，我再想這個時節的蟹粉還可以嗎? 但成品出來，又比我預期中理想。跟餐的干煸四季豆，以及濃雞汁蘿蔔，大家都吃得滿意。單尾的揚州炒飯，雖沒有海參在內，但都算炒得乾身香口，有人中意就咁食，也有喜歡伴上剛才元蹄的汁醬，各適其適。小籠包隻隻靚仔，皮不太厚，湯汁足夠，收口位做得好，我吞下了兩隻。甜品的豆沙鍋餅勝在熱得燙口。我追加了楊枝甘露，收貨。老豆更超級欣賞薑茶湯丸，甚至「安哥」了一碗。人大了，近年每次做節都會少左啲人，真要珍惜還能相聚的機會。
餐廳資料:
御。家上海
九龍塘達之路80號又一城L1樓L1-20號舖
21513262
沒有留言:
張貼留言