Medora - 有心唔怕遲的生日飯

食物：$$$$
環境：$$$$
服務：$$$$

原本七月份的生日飯，因為十號風球既關係，延至八月尾才成事，但有心唔怕遲，反正今年又潤六月，就當是慶祝農曆生日吧！ (雖然我從來唔知自己農曆生日係邊日，哈哈~)

還是來到原定的地點，見識淺薄既我完全唔知道，店子是由星級名廚Vicky Cheng主理，難怪識飲識食既朋友提議來這裡。

餐廳除了環境雅緻，門口還設有雪糕店Liz & Tori，成功吸引我這過氣甜魔的注意。

先來幾款麵包，Grissini香脆，但圓碌碌的那個更合心，中間的蒜頭是神來之筆，個人認為根本不須沾油醋，就咁食最正。

散點幾款分享就好。先來BB蠔周打湯，以一個巨型的Sourdough作器皿，周打湯濃郁，有蠻多鮮美的蠔肉在內。喝完整個湯，食埋隻酸種包，已經飽左一大截。

頭盤揀左凱撒沙律，除左新鮮爽脆既羅馬生菜、脆麵包粒及芝士外，仲有煙肉，同埋醃鯷魚，成件事的層次比坊間的出品更為豐富。

在和牛漢堡與紅蝦意粉之間掙扎了一會，最終決定要後者。Linguine口感唔錯，三隻紅蝦有夠新鮮，記緊用匙將蝦頭的蝦羔弄出來撈意粉，頓時精彩十倍，再邪惡也在所不計。我相信，我哋無揀錯。

飽到一個點，但甜品還是要吃，濃郁的朱古力撻之上灑了點海鹽，咸咸甜甜的味道幾特別，旁邊的法式酸奶油，將整個甜點變得更複雜，有趣！

謝謝朋友的悉心安排~

餐廳資料:
Medora
中環威靈頓街111號地舖
27118088