食物：$$$1/2
環境：$$$$
服務：$$$$
老豆從來都係「順德人」，問佢父親節想食咩，回覆必定就係簡簡單單、唔好咁貴就得喇。
於是，揀吃什麼的重任，就落左係外甥女度。小朋友最喜歡食自助餐，可以走來走去。
家陣香港人食自助餐，必定上兩大K字平台訂購，實在太多優惠。如今次我哋訂既東涌世茂喜來登酒店，有半價，同埋果汁任飲 (正常係要另加錢)。
出去兜個圈，睇睇有咩選擇。先勿論質素，食物選擇比預期中要多，呢個價錢我覺得有晒交代。眾多區域之中，最受歡迎正是凍海鮮，長腳蟹、青口、蜆及凍蝦，尤其是前者，眼前太多人大大碟咁捧回來。平日或會略過的壽司及刺身區，今次我又試了些刺身，請師傅每樣來一點就是。希靈魚、三文魚、油甘及甜蝦等，水準唔太差喎。冷盤區仲有芝士、風乾火腿及沙律等，呢啲「基本嘢」，其實是我吃自助餐必會拿的。有幾樣東西，是看著師傅最場炮製，包括班尼特蛋、燒蠔等，其中新鮮熱辣燒出來的蠔，真的讚。熱葷選擇都唔算少，紅酒燴牛肉、香辣雞尾酒蝦、蟹肉濃湯，蒸比目魚及自家製大蝦雲吞等，甚至乎蟹肉粥及蟹肉伊麵等都有供應，不過我要留肚，就唔食粥水喇。蝦多士及蝦肉千絲酥都是坊間自助餐較為少見的項目。再來些燒味及點心，蝦餃燒賣最最基本，仲見有包點，及小籠包，至於燒味，唔客氣吃了燒鴨髀，同埋燒腩仔。唔知大家有無留意，香港地食自助餐，不論是高中級或平民的酒店，總會有印度美食出現，呢度亦不例外，但選擇稱不上十分豐富，最吸引我是漲卜卜的咖喱角。
係時候甜品環節，各式蛋糕如朱古力蛋糕、芝士蛋糕及Oreo芝士蛋糕等賣相精緻，味道屬減甜版，大概是想贏得港人「甜品唔甜」既最大讚美。另更有提拉米蘇、雞蛋仔及哈根大師雪糕，同埋各式糖果，小朋友最開心。
沒有留言:
張貼留言