偶遇台北 - 簡便午餐

食物：$$$1/2
環境：$$$$
服務：$$$$

荃灣廣場其中一間我喜歡的星馬菜餐廳圍威喂，數月前已結業，又少左個好地方開餐。

該舖位依家變成台灣菜，偶遇台北，瞄過個餐牌，價錢不貴，即管一試。

平日中午十二點零鐘，大把位揀，兩個人坐大卡位都仲可以。當然，我會識做，在繁忙時間前還枱。

點左兩份午餐，台式紅燒牛肉麵係招牌，就要了。依習慣先呷口湯，頗醇厚的，帶微微的辣，麵條煙煙韌韌，兩者都可以。至於主角之一的牛肉，算不上鬆化，還幸都未至於好韌好粗嚡，反而配角的蘿蔔更得我歡心。

鹵豆腐和雞蛋總算入味，唔會死咸。

鹵肉飯味道正常，若然鹵肉份量可以來多些，覆蓋整碗米飯，會更滿足。

午餐跟飲品，呷口熱柚子蜜，都幾舒服。

接近一點鐘離座，仍不見有幾多客人，或者今時今日的香港，連加一要近八十蚊的價錢，已非大眾能經常負擔的午餐了。

餐廳資料:
偶遇台北
荃灣大壩街4-30號荃灣廣場4樓432號舖
52875278