暖心芝作 - 黑芝麻，嘩嘩!

食物：$$$1/2
環境：$$$$
服務：$$$$

荃灣最近開左間小店，以黑芝麻產品為主打，包括黑芝麻豆漿、芝麻糊、菲林筒、雪糕杯，以及軟雪糕等等，廣受街坊歡迎。

同屋企人食Lunch講起，不如買些少外賣回來，當作飯後甜品?

由於芝麻卷限時出爐，我來早了十五分鐘，唯有先買個軟雪糕，邊食邊排隊。貪食的人總有千百個藉口。

黑漆漆的雪糕，再唧些芝麻醬，連脆筒都是黑色的，都幾型喎，最岩影相打卡呃Like。雪糕質感算唔上軟滑，不過芝味濃郁，脆筒係真的夠脆，唔會韌韌的，盛惠廿八蚊，偶爾一次半次，都吃得過。

菲林筒一盒六條，淡淡芝麻香，要挑剔的話係可以薄一點，捲起來會更有口感層次，不過街坊價，就無得太苛求。

芝麻糊與及芝麻豆漿都係好杰身，我覺得前者比坊間唔少糖水舖優勝，反而咁杰身既豆漿，我有少少唔慣。

市道唔好，消費降級，大家可以親民價錢嚐到一點甜，都算係咁了。

店舖資料:
暖心芝作
 荃灣路德圍運通街6號地舖