南海小館 - 開年飯

食物：$$$1/2
環境：$$$1/2
服務：$$$$ 

農曆大年初二，正是與家人吃開年飯的日子，當然要食好少少。

市區大部份酒店屋企人都試過，那就走遠一點，去到海洋公園萬豪酒店中菜廳南海小館。

或者許多人覺得好遠，但其實家陣真的很方便，金鐘轉一個站南港島綫便是，隨時快過出銅鑼灣。

先來幾款點心頂下肚，黃橋燒餅細細粒，色澤金黃，幾好意頭。嚐一口，外皮酥脆，餡料的豬肉及火腿等都香口，可以一試。

鍋貼形狀靚仔，矜貴之處在於加入了蟹肉，但個人而言覺得與坊間一般的鍋貼分別不大。

燒賣純粹是我想吃的，飽滿爽口，也放了些少瑤柱，正正常常吧~

順德煎魚咀由老媽子獨享，佢話做得香口好吃，是全餐最出色的。

接下來是兩款賀年菜式，旺一旺佢！紅燒元蹄寓意原來好多，譬如家肥屋潤、團團圓圓、鴻運當頭、橫財就手等等等，咁就要來一份。大大隻震騰騰，店員幫忙用刀切開，豬皮部份自當骨膠原豐富，瘦肉部份只要順住紋路去食，都唔會好韌，此時來碗白飯佐之就是最好。不過三個人去消滅成隻元蹄，實在有點難度。

另一味賀年菜是胡椒薑蔥煎焗婆參，天真的筆者，還以為會原條上。其實豬婆參本不是很貴價，如果過時過節可以弄得大體一點，必會更好。再講味道，帶微辣的，個人覺得配角的茶樹菇更為搶鏡。

甜品普普通通，薑汁燉奶完全唔香，蛋撻仔熱度略遜，最好是店員推介的紅豆綠茶薄罉，外層微脆，煙韌不黏牙，與數年前的水準相若。

餐廳資料:

南海小館

黃竹坑黃竹坑道180號海洋公園香港海洋公園萬豪酒店B區地舖

35551910