厚德飯店 - 功夫扎實

食物：$$$$
環境：$$$$
服務：$$$$ 

十多年前，在中資機構上班，許多時要出席應酬飯局，其中一家較常去的，正是富豪酒家，即大家所熟悉的阿翁鮑魚。

隨著離開了中資公司，近呢十年惠顧阿翁的次數，十隻手指數得晒。

時代不斷在變，富豪酒家銅鑼灣的總店幾年前亦已消失 (尖沙咀店仲係度，而且多年摘星)，嗰個位變成了依家既厚德飯店。

先食幾款點心，蝦餃本來一籠四隻，不過可以彈性處理轉兩粒，高級食府之作風。澄麵皮不厚亦不黏牙，餡料豐足，卻就是欠缺了筍尖，今時今日很多地方就是如此。

蟹肉海鮮韭菜盒，剛炸出來的，香脆不油，吃時要小心燙口。豐盛的海鮮及蟹肉餡料，結合香口的韭菜，個人蠻喜歡。

另一款香口嘢，正是蝦多士。同樣炸得脆口不油膩，蝦肉蝦膠彈牙，與多士緊緻相貼，唔怕脆皮脆骨，沾些少沙律醬，滋味無窮。

以上數款東西都好吃，不過論全餐最欣賞的，就要數這味魚子醬馬友。潮州的魚飯本來就是好吃，馬友更加是佼者中的佼者，魚嫩又香，師傅更來個中西合璧，在馬友之上添了魚子醬，那咸香的味道跟魚肉一拍即合，妙不可言。

叫多碟麵確保飽肚。叉燒撈粗，至少沒有陣陣惱人的鹼水味，於我而言大致收貨。

甜品的蛋白杏仁茶與及合桃露是敗北，有啲跌眼鏡。

反而贈送的紅棗糕，煙韌不黏牙，沒過甜，來得更合心。

看來都是功架扎實的館子，有機會再來試下佢既懷舊菜式，一試真章。

餐廳資料:
厚德飯店
銅鑼灣駱克道454-456號地舖
23355328