Siam Noodle Co. - 船麵止止癮

食物：$$$1/2
環境：$$$1/2
服務：$$$1/2 

天氣持續炎熱，久唔久會想食啲濕濕地既嘢，如湯粉等，泰式的船麵永遠在選擇之列。

某日經過荃灣海之戀，發現了一間新開的泰式餐廳，以船麵及炒金邊粉等食物為主，捉緊機會去會一會佢。

套餐$98起 (另加一)，有小食、主食及飲品，當然仲可以加少少錢要埋個甜品。我瞄過網上既評論，銅鑼灣總店套餐都係做緊呢個價，大部份人話抵食，不過荃灣店就俾人話貴，到底性價比高唔高，大家不如睇下再判斷?

小食我揀左春卷，兩小條漲卜卜的。咬落去係好熱，可是稱不上脆口，味道可以，除左豬肉碎還有陣陣香料的氣息，再自行沾上酸辣開胃的汁醬，不過不失吧~

麵食隨之而來，店員會跟上調味瓶放在枱上，都係辣椒油辣椒粉之類的東西，對於一向喜歡吃原汁原味東西既我，就無用武之地。

船麵要左蛋麵，湯頭尚算濃郁，豬腩片柔嫩，邊邊帶有肥脂，仲有豬肉丸，味道正常。靈魂所在故然是炸豬皮，份量都唔少的。呢碗船麵，不是最高汁，卻合格了吧！

椰子雞湯河亦送來，湯頭以椰香為主導，辣勁不強，還隱約嚐到少許酸味，收貨的。餐牌上寫的是河粉，實際上係金邊粉來的，是但了吧~ 配料除了雞肉，更有菇及豆腐等，可是雞肉十分嚡口，我寧願食船麵。

椰子雪糕要加錢，不過我覺得值得。煙韌的椰子雪糕份量唔細，仲有唔少既新鮮椰子肉、椰果、花生及炸粟米等，成件事幾豐富的，作為午餐的埋尾，係圓滿既。

泰式奶茶係最普遍的牌子，味道相信不用再多說。

餐廳資料:
Siam Noodle Co.
荃灣大河道100號海之戀商場1樓1005號舖