點天下 - 充滿毛孩的點心專門店

食物：$$$1/2
環境：$$$1/2
服務：$$$1/2 

假日難得睡到自然醒，忽然點心癮起，但又唔想走太遠，做人真係好矛盾。

屋苑商場其實有間酒樓，但原來我更想吃點心專門店，終是便過來南豐紗廠，步程都係十分鐘左右啫。

由於紗廠本身係超級Pet Friendly既地方，所以呢間點心專門店，係有唔少狗奴帶埋佢哋既主人一齊嘆點心，當然就是坐門外嗰幾張枱。

隨手選來幾款點心，其一是子母蝦餃。所謂子母蝦餃，即是有粒小小蝦餃型狀的物體在原本的蝦餃之上，但內餡當然不是蝦，而係Wasabi。賣相幾得意既，打卡一流。本身隻蝦餃偏淡口，就是要靠那日本芥末來發揮作用，整體而言，不過不失喇！

隨之而來的叉燒腸粉，終於唔係家陣坊間嗰啲一條過長過我條命既出品。一碟三條，腸粉皮是有點厚，有欠滑溜，其實有幾分似兒時係屋村茶樓食既腸粉。

金粟香煎鯪魚餅，熱得燙口，吃時要小心。口感帶點煙韌，又正所謂一熱遮三醜，呢個出品衰極有個譜。

最後亦來點甜的，可惜所揀的椰汁桂花糕，全無清新感覺，早知食馬拉糕好過。

勝在平平地，街坊價，偶一為之都未嚐不可。

餐廳資料:
點天下
荃灣白田壩街45號南豐紗廠1樓109-110號舖
52201765