食物：$$$1/2
環境：$$$1/2
服務：$$$$
好耐無飲茶，趁週末一行八人去歎下，地點主要就大家方便，沒有刻意去光顧五星級酒店。
酒樓叫碧儷苑，好有居屋既感覺，只係我諗多左。
翻開點心紙，有唔少懷舊與及創意的點心，究竟能否做到新舊共融，還是不倫不類?
柯打左一大堆點心，坊間見慣見熟既款式就唔係度長氣，看一些較有特色的系列吧！
難得見到真正既灌湯餃，而唔係家陣市面氾濫的那些浸在湯內的出品，馬上來幾隻。形狀好似樣的，雖然湯汁唔算豐盈，但餡料還是滿滿的，今時今日吃到這樣子的灌湯餃，已經無咩可以投訴。
所謂太極蝦餃，查實只係一籠入面有兩粒黑兩粒白而已。黑白兩款味道沒什麼區別，澄麵皮唔黏牙，蝦肉餡料很充足，要挑剔是吃起來比較乾。
腸粉叫了兩款，叉燒腸是皮薄，上桌時已切好一件件方形的，味道正正常常。另一款則是我未見識過的，櫻花蝦脆蝦腸。腸粉皮包裹著炸脆了的蝦，頂面灑了大堆櫻花蝦，賣相幾特別，打卡岩晒。
之後的紅袍荔枝，外表的確是有幾分像，咬落去有點硬脆，裡頭是奶黃餡，還混入了丁點荔枝肉，蠻有趣的。
十年八年前，菲林筒這款點心幾乎絕跡，不過依家又多番地方有得供應。煙煙韌韌的口感素來討好，可惜芝麻香太過薄弱。
甜品的可愛小兔，我起初還以為是棉花糖之類的東西，原來我錯了。紫薯包做起Cutie兔仔造型，碟底放了乾永，上桌時店員還會加水做出煙霧效果，大人小朋友見到都會開心。看見小朋友一口氣吞下了兩隻，相信味道唔會太差。
印象中喺呢邊，我只食過湯包餃咋😅
回覆刪除有得食湯包餃都好好了
刪除