Thai Nine - 曹公坊的泰菜對疊

食物：$$$1/2
環境：$$$1/2
服務：$$$$ 

荃灣曹公坊既泰菜館 Ann Mamma Thai Kitchen by 張秀玲，門庭若市，想吃請有等位的心理準備。

反而，旁邊新開的泰式小店Thai Nine，不單可以直行直入，更隨時可以揀位，與Ann Mamma形成強烈對比。

或許只係太新未有人認識啫，我係咁諗。忽然好有冒險精神，去做一次白老鼠，睇下會唔會有意外驚喜。

午餐有十二款選擇，價錢劃一在$78，另加一，已包小吃與及飲品。

中意食乜，自己QR Code落單，唔使假手於人。

其中一款小食，係番茄，清甜多汁，放了些少蔥花及泰式辣醬，帶出泰式風情。

喜歡香口嘢既朋友，可以升級蝦餅或者雞翼，蝦餅稱唔上金黃靚仔，卻至少做到彈牙質感，可以收貨。

主食之牛肉船麵，湯底幾濃郁，真有幾分似在曼谷的口味。牛肉只是普通肥牛貨色，配幾粒肉丸及索味既豆卜，最重要既炸豬皮仍有在陣。粉是兩溝，在港吃到呢碗船麵，叫做可以暫時止止癮。

蟹肉炒飯跟上煎蛋，採用的相信是日本蛋，蛋黃偏橙色，味道濃郁，又煎到燶邊，直接拉高分數。試了少許炒飯，弄得夠香口，內含唔少蟹肉，絕不欺場。

青檸梳打係唔需要加錢的項目，若你想要泰式奶茶，呢度都有，俾多五蚊就可以。

餐廳資料:
Thai Nine
荃灣曹公坊5號地舖
57282626