食物：$$$$
環境：$$$$
服務：$$$$
作為荃灣人，當然到訪過如心酒店的中菜廳，飲茶晚飯都交到功課。
無嚟一排，原來餐廳進行左大翻新，升呢到好似五星級酒店咁，我以為自己眼花。
硬件整得靚一靚，最緊要都係食物可以配合到，係咪?
不過當我知道和昌既葉師傅過左檔嚟呢度，我就放心了，畢竟和昌啲嘢食都幾岩我口胃。
有朋友打點，寫好菜單，我最中意餸來張口的感覺。
酸酸甜甜既話梅蕃茄作開場是最合適不過。叉燒厚切，肉質好鬆化，燶邊，也有蜜味，有誰不愛?
燕窩釀雞翼不是這兒首創，但色澤金黃，外型飽滿，咬落皮脆而裡頭塞滿燕窩，還有點點松露香，都是高水準之作。
坊間大部份鮑魚酥，都是撻皮之上放置鮑魚，但呢度就不一樣，以酥皮包裹著原隻南非鮑魚，非常靚仔。用刀一切，就知道個酥皮做得一流，內裡的鮑魚一點不韌，這個做法我在紅棉嚐過，但呢度都做得同樣精彩。
再來的湯品，係椰皇。打開蓋，香氣撲鼻而來，椰皇之內還藏著錦繡球豆腐，盡顯師傅刀功。呷一口，清甜得不用多說。
薑蔥花膠煲，花膠爽中帶點煙韌，蠻討好的，蒜子當然也不可錯過。
黑醋骨又係做得好，咬落微脆，肉質鬆化，酸甜味平衡得宜，陳皮既香氣令整件事更上一層樓。
冬菇、雞髀菇及露筍三個不同口感，結合松露之香氣，菜蔬也可以來得惹味吸引。
估唔到單尾既砂鍋牛肉飯都咁邪惡，當然不是說那安格斯牛，而係每人會分到半隻入口溶化既鵝肝來配呢個飯。
食埋個菲林筒同埋蛋白杏仁茶作總結，好滿足，要多謝搞手既安排。
沒有留言:
張貼留言