星河餐廳 - 就是焗豬

食物：$$$1/2
環境：$$$1/2
服務：$$$1/2 

因為一個食評家既推介，因為MM既專訪，令呢間在深水埗屹立多年的老店，突然出現長長之人龍。某次經過深水埗，也被那人龍嚇怕，轉左去食蛋牛治。

坦白講，我，真係由細到大都從未見過呢度要排隊。

不過，香港人從來都只係三分鐘熱度。兩個多月後再訪，直行直入，可以揀位坐，是真正的復常。

雖然有蒸飯餐特餐等選擇，不過都唔使揀，咁多年來都只為一款食物，就是焗豬扒飯。

餐湯有紅有白，忌廉湯又稀又淡，羅宋湯酸中帶微辣，多肉也多菜，反而保留到少少以前既味道。

焗豬扒飯查實都有啲參差，我個兜既燶邊明顯無咁多。

幾十年始終如一的做法，沒加芝士沒有菠蘿，就是番茄醬汁結合蛋炒飯底，已經夠照。

粒粒分明的炒飯與酸中滲出甜味的汁醬，簡單就是美。洋蔥、番茄，與及鬆化的豬扒，無需要芝士的襯托，依然明艷。

厚身奶茶杯盛起的出品，香滑幼滑，很典型的一杯港式奶茶。

不是一流的服務，只是富人情的服務~

餐廳資料:
星河餐廳
深水埗大南街374號
27288371