2023年2月22日 星期三

赤身燒肉USHIO - 食肉獸既天堂



食物:$$$$
環境:$$$$
服務:$$$$ 

我喜歡吃壽司刺身,也經常吃拉麵沾麵,壽喜燒我都岩,不過要講到最愛,就要數到鐵板燒同埋日本燒肉,畢竟我都係一隻食肉獸。

吃日本燒肉,『霜降』當然是脂香爆澎,但其實『赤身』亦唔一定係次一等,始終去到咁頂級既和牛,真係瘦極有限既。

瞄準左呢間從福崗過江既赤身燒肉USHIO好耐,今日終於有機會去擦番餐。

唔諗咁多,叫左個$1,388 既『和』套餐,集齊餐廳最精選既靚牛肉部位。除左牛舌無辦法入到口,要用澳洲貨之外,其餘的都係鹿兒島的『新村和牛』,肯定正!


沙律前菜唔多講,單刀直入正題,睇燒肉啦~

一開波就來個Yakisuki,長長薄薄既西冷淋上醬油再去燒,店員用純熟既手法,好快咁燒好。沾埋日本的生蛋黃,自然是香甜嫩滑,溶入口腔。

跟住係牛舌,保持到我喜歡的爽脆口感,上面放左蔥,吃起來感覺無咁膩,係幾好既安排。

辣椒肉,查實就係上腿肩胛肉,肉質是較為幼細。上後腰脊肉係厚身啲,比較有咬口。

肉眼好夠腍身,今次配上蔥絲,又是另一番滋味。

重頭戲,也是我全晚最期望既部位,牛柳芯。只用牛柳中芯最柔軟細嫩嗰丁點,邊有可能會唔好食。加之,火候拿捏得恰到好處,中間帶嫩紅既色水,入口極之嫩滑,夾埋香脆既蒜片,無得彈。

飲杯牛肉湯作間場,我哋繼續!

之前係鹽燒,跟住落嚟就輪到三款醬燒。

友三角既薄又相對較多油花,吃起來自然軟嫩,簡單沾上自家的燒烤汁已經好掂。

不過講到柔軟和脂香,牛板腱係更勝一籌,所以會配上爽口既菇俾大家去中和一下。

最後以一件肉味相對重番些少既和尚頭作燒肉既結尾,食肉獸表示大滿足。

然而套餐是未完的,仲有咖喱飯或者牛尾湯麵。咖喱汁既甜香可以令人輕易清左碗飯。不過一向細食既我,來份爽身的麵條就好。

以泡芙作個完美終結。呢個套餐唔平,但我認為係物有所值,至少我呢個食肉獸無任何投訴。


餐廳資料:
赤身燒肉USHIO
中環威靈頓街2-8號威靈頓廣場地舖
23282318


2 則留言: