2022年8月12日 星期五

雲龍軒 - 就算世界無童話



食物:$$$1/2
環境:$$$$
服務:$$$$ 

廸士尼酒店我到訪過好幾遍,不過探索家酒店,孤漏寡聞既我都係要掹外甥女衫尾,先有機會見識到。

與廸士尼酒店好唔同,無左種進入童話世界既氛圍,大量木材與及植物,反而令我覺得有置身新加坡的感覺。

酒店房間唔係度詳述,反而想講下酒店的食肆,雲龍軒。

只有午市套餐供應,不過就有齊頭盤、點心、小菜、湯品、飯麵,以至甜品,都足夠了。

六條友,頭盤可以揀三款,青瓜混入左柚子醋,成件事比較普通的手拍黃瓜清新十倍。墨魚片唔會韌得像趙擦字膠。叉燒賣相唔算好靚仔,勝在鬆化,帶蜜汁之香甜。

蟲草花燉湯就相對失色,唔香,味道亦偏淡口。

之後係四款點心,蝦餃形狀唔錯,外皮晶瑩不黏牙,餡料爽口好吃。腸粉煎得夠香口。今時今日既春卷都是長長幼幼的,個人其實喜歡傳統那些短和粗身的出品,口感才夠豐富。

常說不要在粵菜館子吃小籠包,坦白說,佢已經算係做得不過不失的了,在幾分似滬式食店既出品,但仍稱不上皮薄多汁、可夾起盪鞦韆的高質小籠包。

小菜可選三款,清湯蘿蔔牛小排唔錯,驟眼睇以為牛小排會好嚡口,現實卻是幾鬆化的。

鮮淮山露筍炒帶子,帶子厚身,火候控制唔錯,露筍有去皮,吃起來沒渣。銀魚醬炒蝦球有西蘭花伴邊,賣相比較優勝,而蝦球亦大隻爽脆。

豉油皇鴨絲炒麵爽口,唔會食到一口油。黑菌飄香荷葉飯夠香夠味,蠻有水準的。

甜品的小白兔肯定討小朋友歡心。奶皇菠蘿包,以米奇造型出現,但我還是喜歡傳統的菠蘿包多些。

炎炎天氣,我都係食番清爽的楊枝甘露好了。

入廸士尼,食都係其次,重點始終係同小朋友來開心下。


餐廳資料:
雲龍軒
大嶼山香港迪士尼樂園迪士尼探索家度假酒店2樓
35102000

4 則留言: