食物：$$$$
環境：$$$$
服務：$$$$
一件「肥牛哥」事件，令原本已旺場的千海水產更加人氣沸騰，想食真係要早啲訂位。
好多人以為千海只係係海鮮池任撈海鮮，其實唔止，你仲可以經QR Code落單點火鍋既肉類、熱食如比目魚、燒乳鴿，甚至煎鵝肝等，自助餐區更放滿冷盤、點心、菜蔬，以及甜品，全部都係無限量供應。第一件事，柯打左個火鍋湯底，再拿著筒出去撈海鮮。揀左金湯花膠雞鍋，以及椰子雞鍋，前者濃郁後者清甜，唔會揸流攤。海鮮池既海鮮款式都算幾多，大頭蝦、基圍蝦、九節蝦、鮑魚、美國蜆、花甲、沙白、三點蟹等等，據說以前仲有蟶子，不過這次就見唔到。嗱嗱聲樣樣拎啲，撈滿一筒俾店員作清洗，再去攞飲品及其他嘢食。畢竟都是活生生撈上來，質素總不會差得去邊，個人龍為主角並不是蝦，反而係三點蟹，與及花甲，好鮮甜。再出自助餐區睇下有咩食，冷盤有雞翼尖、涼拌魚皮、豬耳等，每樣淺嚐一點就好。點心小量，蝦餃燒賣及小籠包，都是可吃可不吃的項目。熱食既烤粟米最岩小朋友，炆豬手老爸吃了不少，仲有日式炸物，同埋小龍蝦，但我對小龍蝦始終印象麻麻，沒有拿來吃。
經QR Code柯打的食物也隨之而來，火鍋配料的肉類選擇蠻多的，澳洲和牛、美國牛肩胛、豬梅片及羊肉片等皆可選，而且質素比想像中要高，食肉獸表示滿意。生蠔隻隻飽滿，好有水準喎！仲有蟹粥供應，不過我既食力就無法駕馭了，聽聞是幾清甜的。熱食也絕不失禮，煎鵝肝、中式燒乳鴿，烤羊架等，比唔少中西餐廳更出色。甜品前先吃些菜蔬菇菌，款式非常之多，大大話話幾十款，就連紫羽衣甘藍、旺菜、椰菜苗及水連菜等都食到。燒菠蘿同埋燒榴槤，每樣兩件，滿足。
甜品櫃有芝士蛋糕、Donut、大福及焦糖布甸等，雪糕櫃就更岩小朋友心水，又雪條又雪糕磚，開心死。最後老人家再落單要個木瓜糖水，大人細路老人家都捧住個肚離開。三小時的午餐任食，的確係幾吸引既，不過記住量力而為，唔好食壞自己，同埋唔好將食物放入袋拎走呀~
餐廳資料:
千海水產海鮮火鍋放題
荃灣大壩街4-30號荃灣廣場B1樓B126號舖
36222223 / 36222226
沒有留言:
張貼留言