聚興家 - 星級酒店總廚聚腳地

食物：$$$$
環境：$$$
服務：$$$$ 

太子的聚興家，係唔少星級酒店總廚的宵夜聚腳地，水準自然了得。

呢家行內人既飯堂，平時只做夜晚，早前的晚市禁堂食，到底佢係長期休息，抑或變陣轉打午市，我沒有細究。

我只知道，晚市堂食重開，係時候帶埋老豆老母去擦番餐。

食物水準我沒懷疑，嘈到拆天的環境也是客觀事實，咪講笑，真係嘈到頭痛，老豆大叫怕怕。

煎米粉是這裡的名物，不可錯過，問題係配什麼材料呢?

是夜可配澳洲龍蝦、南非鮑魚、蟶子，以及海蝦，如果想便宜一點，可以選擇草蝦。

最終選來了海蝦。蝦肉爽甜，就是蝦殼也夠脆口，是好東西。然而，主角始終是底下的米粉。真的是超級脆口，且完全不油，沾些少汁醬來吃，要清碟是毫無難度。

另一招牌菜，正是酸菜魚。原條斑上，份量十足，近五舊水的價錢雖不便宜，卻也算合理。

師傅採用了潮州酸菜，湯底也是調校過，並不是傳統的四川做法。先呷啖湯，酸中帶點辣勁，不是川辣，但對我等吃慣粵菜的人而言，倒是合口胃。再者，魚肉彈牙有質素，份量又足，令人滿意，再食埋墊底爽口的菇和娃娃菜，大滿足。

生炒骨反而不似預期，甜酸汁醬雖平衡得好，緊緊包裹著腩排且沒有過剩，可惜排骨有欠鬆化，是要挑剔的地方。

下次搵幾個麻甩佬再來，整隻燒乳鴿，啤啤佢！

餐廳資料:
聚興家
太子砵蘭街418號地舖
23929283