新澳咖啡餐室 - 我食個常餐啫~

食物：$$$1/2

環境：$$$1/2

服務：$$1/2

繼九龍城聯發與太子巨人冰室之外，又一間與澳牛名字拉上關係的茶餐廳。

新澳咖啡餐室，抽水味濃，我無興趣知道佢既前世今生，反正做左飲食業基層咁多年，什麼股東不和，什麼第二代開新line，千奇百趣的東西，也見慣不怪，我都係食個常餐啫。

有一樣嘢，佢同澳牛好似，就係要安排客人坐指定座位。

　　　

明明是非繁忙時間，大把吉枱，點解要我同人搭枱？我啋佢都有味。

如果係繁忙時間，人客多的話，我一定會識做的。

點左個常餐，都係火腿炒蛋加多士、沙嗲牛麵嗰啲嘢囉。

賣相是跟足晒，多士是烘得香脆，炒蛋做得滑溜，呢碟嘢係幾好的。

兒時幫襯的屋村茶記，沙嗲牛肉麵都好有水準，跟這一碗的出品，真不可同日而語。

若大家知道邊度仲有好既沙嗲牛麵，請通知我！

杯奶茶實在及不上澳牛，或者聯發了。

無耐，有兩個客人又被安排同我搭枱，其中的女士都係嗰句：大把位，點解死要人撘枱？

餐廳資料:
新澳咖啡餐室
紅磡民泰街53-73號地下F1號舖
37020221