Feast - 再講，半自助~

食物：$$$$

環境：$$$$

服務：$$$$

話說之前跟大家介紹過官塘如心艾朗酒店Forte的半自助餐後，不少朋友私底下問我仲有無其他地方的Semi-Buffet推薦，最好是港島區，原來大家對半自助餐咁有興趣。

港島區當然有半自助餐啦，太古Hotel East既Feast，筆者早在七年前酒店剛開業時已介紹過(可按此重溫)，咁多年後質素到底Keep唔Keep到，如今再同大家睇真啲。

家陣酒店玩緊Urban Garden呢樣嘢，在四樓種植香草及菜蔬等，以供應這個半自助餐，這個做法，用料肯定新鮮。

     

既然講到菜蔬是咁新鮮，一於取些少來親身求証下，一試之下，的確唔錯。

不過，我更喜歡的，是莎樂美腸，以及幾款風乾火腿，咸香軟熟，我甚至「安哥」了一遍。

凍海鮮去到那兒也是受歡迎的項目，青口、小龍蝦、蟹腳、凍蝦，乜乜乜，然而，最多人搶攻的，必定是即開生蠔，海水味甚重的，我吞下了兩隻。

可能天氣太熱，這晚竟想吃幾件壽司，用料都唔差，飯糰很大舊，大概是外面的一倍咁多，吃幾件已開始有飽肚感，但主菜仲未上呢！

主菜有數款選擇，但春雞與肉眼有二人份量，我們四人分剛剛好。很幸運，分到了雞髀的位置，皮香，而且肉質更嫩滑。大家可也是茹毛飲血之人，肉眼扒可以生少少，Medium Rare的出品，嫩紅的肉質，鬆化卻保持肉香，帶肥脂的部份更甘香好吃。至於配菜，薄荷新薯比較軟腍，還是香口的炸秋葵合心我。

眾多甜品之中，個人幾中意提拉米蘇，濕潤可口。

吃罷幾款蛋糕後，要來些不同口味的馬卡龍及巧克力曲奇，配我手中的拿鐵至岩數。

呢間半自助，大家不妨試試～

餐廳資料:

Feast

太古太古城道29號東隅1樓

3968 3777