新店速遞：Salt Recipes - Hea 住食海鮮

食物：$$$1/2

環境：$$$$

服務：$$$1/2

工作繁忙，人也愈來愈Out了。就連元朗最新最潮的商場形點，筆者亦沒有到訪過 (推掉了兩場這裡的tasting啦!)。

好不容易找到個空檔，來這人氣商場，吃過午餐，見識下。

兩點多才到埗，不過商場仍是人頭湧湧，許多食肆均要排長龍等位，好似唔使錢咁，最終選挑中了主打北歐菜的Salt Recipes。話時話，呢個菜系，香港真係無得多家。

唔好誤會，咪以為Salt Recipes唔需要等位，只因為它位處於超特色家品店Homeless內，可以睇住時尚傢俬，待有位才進去。

簡約

景觀開揚，加上簡約的裝修，是餐廳最大的賣點。尤其是陽光燦爛的日子，慢慢地享受悠閒午餐，多麼舒適。

 

喜歡紅菜頭

點了三份午餐，都係Share食囉，可以多試幾樣嘛！套餐跟湯或沙律，咁樣就兩樣都可以試得到。嚐了幾匙磨菇湯，算香濃，但沙律似乎更出色，紅菜頭清甜，各式沙律菜新鮮爽脆。

 

香噴噴

主菜陸陸續續送來，率先奉上的，竟然是焗挪威魚批。焗得香噴噴之餘，薯茸金黃細滑，裡頭含三文魚、鱸魚和紅鰹魚，口感豐富，難得三文魚亦沒有腥，頗具水準。

 

唔得外脆內軟

其次，我們有吞拿魚香草窩夫。窩夫之上，鋪著吞拿魚茸，以及煙燻吞拿魚片，講外型，唔算差。此品最大的弊端，是窩夫欠缺外脆內軟的口感，還幸吞拿魚的味道可口，仍可勉強合格。

 

爽身

最後一味主菜，為香烤大蝦天使麵。成品奉上，無疑會是醒胃吸引。天使麵本身的口感尚可，至少是爽身。大蝦烤得香口，如肉質可更彈牙，就一流，當然蝦頭的部份會更加誘人。

 

大口喝

放棄了是日的特飲，選了平實的凍檸檬茶，也可滿足。

 

梗要來一枝

餐廳門口的自家制雪條，色彩繽紛，賣相是一等一誘人，但在餐廳內享用要加一，出去買慢慢行街街食就唔使，咁我梗係…

 

色彩繽紛

選了一枝芒果熱情果口味，味道過得去，但$32/枝，未免有點貴。

餐廳資料:

Salt Recipes

元朗元龍街9號形點一期2樓2042號舖

2320 0979