食物：$$$1/2
環境：$$$
服務：$$$1/2
上的士，說好了街名及店名，司機話唔識路。Call台問，人家也很清楚的道出是荔枝角道和塘尾道交界，我亦補充是在雷生春附近，司機仍然說不知道。又話自己是香港車唔係九龍車，呢樣個樣，還不停俾說話我聽。若不是下著傾盆大雨，我早已落車。
當然不會被司機影響心情，吃好東西才最緊要。甫坐低，先要兩件牛肉餅，其他的慢慢再點。講開又講，一提起牛肉餅，十個人有九個 (包括我)第一時間會諗起九龍城的清真牛肉館，但其實呢間的出品都可以呀！
牛肉餅上檯，熱辣辣，餅皮薄而軟熟，不會韌；裡頭的肉汁跟清真牛肉館一樣，是相當澎湃。累積了豐富經驗，有技巧的吃，唔會吃到肉汁四濺，不過同事就食得有點狼狽。牛肉，肉質鬆軟，而味道就嫌不很濃郁。單以牛肉餅去比，九龍城的是稍勝一籌。
後加了蔥油餅，同樣是熱得燙口，而且餅皮鬆軟，口感幾好。再彈的是，味道較為淡口，如果能放多點蔥粒，會更香更美味。
再試這裡的另一名物，孜然羊肉。服務生送上來時，已散發出陣陣孜然粉的香，再加上薑、蔥和辣椒去爆，惹味之餘，並不太辣。羊肉片嫩滑，但我反而覺得羊羶味稍缺。不過，夾著蔥油餅去食，幾正的。
吃至此時，也想飲些飲品，豆漿好了。感覺是豆香不足，同埋唔夠冰凍，並不算出色。
吃得七七八八，雨勢亦減弱，馬上埋單走人。
餐廳資料:
馬家莊清真館
太子塘尾道197-199號地下8號舖
2398 8019
沒有留言:
張貼留言