食物：$$$$
環境：$$$$
服務：$$$$
與識飲識食既朋友晚飯，梗係由佢揀地方，佢傳來一個我很陌生的店名，Nocino。
馬上上網睇睇，原來是手工意粉專家，總店在大坑，而且官塘都開左分店，我真係大鄉里。
小小店子，人氣好旺盛，Walk in 唔使旨意有位，即使訂了枱，都要等一陣子。
店員會推介餐廳的招牌食物，唔係放低個餐牌就走人，印象分唔錯。
先來的牛肉他他，牛肉切得比較大粒，口感唔差，綠色那些由芹菜及蔥等打造而成的汁醬，沒有惱人的草青味，估唔到同佢牛肉他他都夾得來，混合埋頂頭脆卜卜的炸薯絲，質感更具層次，我喜歡。
店員推介Malakoff這傳統的瑞士小吃，即管來一份。用上 Gruyère 的瑞士硬芝士來製作，外層包麵包糠再炸至香脆，咬落好好脆可口，但要小心燙咀巴。起初還以為內裡會帶有流心效果，原來只是一點點緩緩的流出，但外脆加上芝士香的出品，已成功俘虜了我的心。來到這裡，又無理由唔柯打手工意粉吧！朋友話事，選了麵包蟹黑胡椒意粉。手造意粉的質感自然出色，蟹肉成份也寧舍多，加上芝士及黑椒，重口味又好飽肚，硬要挑剔既話，是黑椒稍稍下得太兇，有少許失衡。提拉米蘇濕潤，細滑而且滿載咖啡酒香，傳統做法。另一款的栗子及黑加侖子芝士蛋糕，成件事好有冬日感覺，味道不遜於傳統的提拉米蘇。欣賞店員上每一道菜色，都會細心講解，之後亦會問食客意見，係香港已好少遇上如此有溫度我小店了。
九點後仍有食客等位，咪阻住地球轉，食完快趣埋單走人。見店員請等緊位既食客飲白酒，小小舉動，已很窩心。
論意粉，隔離街另一人氣手工意粉專門店似乎略勝一籌。但論整體Dining Experience，呢度贏左。
沒有留言:
張貼留言