八味客棧 - 中西合璧

食物：$$$1/2
環境：$$$$
服務：$$$$

原本想吃的首爾過江龍豬腳小姐人滿為患，我倆站在金朝陽二期，盤算應該往那個方向去。

忽然想起，係IG定唔知邊度，見過有間幾打卡既點心專門店，不如去搏一搏?

以古代客棧為主題，裝修的確幾有特色，尤其喜歡佢擺放多件仿古的擺設，加上惠顧當晚人客不多，感覺好舒服。

就是茶壺及餐具都充滿特色，可惜茶葉質素辜負了咁精緻的茶具。

兩個人吃不了太多，都是專攻點心就是。叫做「頂！太瘋小籠包」，相信是店家的招牌之作。皮稱唔上好薄，但外型都算靚仔，咬落確有豐盈的湯汁，是合格的，但又未至於好味到太瘋咁囉。

麻辣燒賣，口感唔算好實在，正如友人所講，唔知點解有少少似食緊雲吞咁，但味道正常，有點點花椒油帶出的麻香。

蘿蔔絲酥餅三隻都有小小爆開，賣相扣了分。好熱的，吃時要小心燙口。外皮尚且鬆化，蘿蔔絲餡蠻多，都清甜多汁，若非爆左口，呢個會是三款之中既出色的點心。

未知那來的勇氣，我們竟然點上了兩款西式甜點。其一係近期流行的開心果千層酥，酥皮都算鬆化，開心果茸香滑，配上兩粒麻糬是神來之筆，雖講唔上話頂級之作，然而係點心專門店食到呢個質素既西式甜品，交足功課有餘。

以瓦煲盛載的Tiramisu，又幾過癮既。打開煲蓋，隱約看見福字，中西合璧玩到咁盡。據悉是用上伯爵茶作忌廉，以取締傳統的咖啡酒及Mascarpone Cheese，質感沒太大投訴，但我還是喜歡有點點酒香的傳統製作。

反正都係，唔爭在試埋呢度既咖啡。不難想像，都是以中式器皿來盛載，拿鐵也有拉花，是有趣之體驗。

餐廳資料:
八味客棧
銅鑼灣霎東街33號智選假日酒店1樓RHS號舖
26177008