家後 - 大愛洋蔥煎餃

食物：$$$$
環境：$$$1/2
服務：$$$1/2 

睇番紀錄，原來筆者對上一次幫襯家後，已經是三年前既事。

本已幾乎忘記了這裡，忽然You Tube彈出某明星介紹這餃子的舊影片，可能是提醒我要再去試試佢水準有無因開分店而下跌。

再去，也都是選擇總店，因我想有個對比，或許這是我等老嘢既思維。

餃子之前，先來碟紅燒豬手飯，也是店方的招牌菜式之一。

三件豬手好巨型，皮厚入味，骨膠原豐富，而且都有唔少肉，唔係齋食皮嗰種，比坊間唔少的食肆優勝。

作為餃子專門店，當然有眾多款式的湯餃和煎餃。平時我多半會揀韭菜煎餃，但想起明星You Tuber大讚呢度既洋蔥豬肉餃，即管一嚐。

新鮮煎起熱呼呼，底部夠香脆，紫洋蔥的爽甜跟豬肉確係好夾，十分好吃，比我以往在任何地方吃過的韭菜豬肉餃都吸引，果然無介紹錯！

呢度既另一必點項目，正是芝士蛋糕，皆因店主的太太是日本人，好叻做甜品，才會在餃子店內有人氣蛋糕出現。

質感細滑，芝味恰到好處，加上邊邊既焦香，仍舊保持水準。

接近繁忙時間，門口開始有人排隊，快趣有埋杯嘢就讓番個坐出嚟~

下次要試埋佢既開心果口味芝士蛋糕。

餐廳資料;
家後
深水埗基隆街211號地舖
23978131