麒天 - 今時今日的Sky Dining

食物：$$$$
環境：$$$$
服務：$$$

曾幾何時，經常踏足ICC 101樓的食肆，每星期起碼兩、三次，在龍壐或者翡翠雲臺醫肚。

不過都已是咸豐年前既事，自己都記不清有多少年沒搭過呢部Lift～

龍壐呢個位，今時今日就由麒天去接手，好有興趣去試下。

景觀唔使多介紹，總之就有大地在我腳下之感。

甫坐低，先奉上小食，有我喜歡既蕎頭，惹味既漬蒜頭，與及鬆脆之琥珀合桃。

中午飲茶，都係吃點心為主。蝦餃摺得靚靚仔仔，外皮不太厚，足料爽口，還加入了筍尖，基本功到位。

蟹肉石榴餃，香檳色澤好吸引，連小朋友都話想食。

形狀雷同的松露羊肚菌餃，晶瑩剔透，看得穿裡頭的餡料，吃起來也爽口好味。

麻婆豆腐餃既顏色又是相當誘人，咬落唔黏牙，帶出點點麻香，以點心去計佢既辣度都算唔弱。

幾款點心賣相都好精緻，不過論最吸睛的，必要數到金魚餃。色水靚，外型似，連金魚咀都做得好，細節位跟到足。外皮比想像中滑，龍蝦肉爽口，唔係得個樣。

磯煮鮑魚燒賣，鮑魚做到軟腍入味，燒賣味道亦正常，但我總覺得鮑魚跟燒賣係唔應該放埋一齊的。

鱈魚窩夫春卷，即叫即炸，吃時要小心燙口。講真，又脆又熱呼呼的東西，邊有得輸。

和牛腸粉上桌時已切開一隔隔，還有一片牛肉鋪上面，味道可以，不過因沒有跟豉油或其他汁醬，吃起來感覺有點乾。

慣常地柯打個炒粉麵，原本想叫讚歧烏冬俾小朋友吃，可惜售罄，蝦籽撈粗都好啦！夠香又沒有梘水味，已經收貨。

食到七七八八，係時候甜品環節。豆腐花、草莓大福等都引到小朋友去品嚐，但我認為外型最可愛的，大概就是鳳梨酥。

反而我選的荔枝石榴露，雖然近排好流行，我卻覺得不及楊枝甘露好吃。

搵晚來試下佢既tasting menu~

餐廳資料:
麒天
尖沙咀柯士甸道西1號環球貿易廣場(ICC)101樓C號舖
36197123
52883133 (WhatsApp)