食物：$$$$
環境：$$$$
服務：$$$$
十二月，是馬不停蹄去周圍去食既日子。
回顧其中一餐超豐富，在沙田帝都酒店的日本料理YAMA，可以用瘋癲去形容。
打頭陣的揚出豆腐，嫩滑是理所當然，妙在配上了炸牛蒡，兩者出乎意料之外地合拍，有個好開始。
刺身盛合都叫左兩盤，帆立貝、吞拿魚、中拖、油甘、鲷魚及牡丹蝦等爭艷鬥麗，款款新鮮，全是好東西。
論最吸睛的，當然就是牡丹蝦，爽身鮮甜，令人回味。
粒貝取其爽脆，口感與象拔蚌相約，但更吃得過。
磯煮鮑魚採用了南非的孔雀鮑，以常見的磯煮做法，保持肉質鮮嫩彈牙，墊底既蘿蔔煮盡鰹魚汁之精華，又夠軟腍，誓要與鮑魚爭一日之長短。
一系列既天掃羅之中，海膽天婦羅無疑是最受大眾歡迎。鬆脆既外層與軟滑的海膽做出分明層次，紫菜與及紫蘇葉起了畫龍點睛之作用。
另外的各式天婦羅如海老、秋葵、紅椒和南瓜等，交到功課。
款款串燒都想食，結果就係叫得太多太多，牛筋肉軟腍，豚肉卷重點是加入了紫蘇，免治雞肉棒水準合乎預期，較特別的有雞胸軟骨，坊間不是很多地方可嚐到。
芝士條也是燒香過，更加誘人，我豁出去了。
牛舌的爽彈口感，同樣輕易俘虜我心。
愛吃魚的朋友，燒Kinki應該抗拒不了吧!
天真地以為汁燒吞拿魚鮫唔會好巨型，點了兩客，結果出事了。大家見到咁誇既魚鮫，眼都定埋，不過既香口又滑溜既出品，的確係好正斗的。
仲有個牛肉朴葉味噌燒，味道濃郁，牛肉吸入了味噌之精華，只要唔好浸得過韌，那有不好吃之道理。
甜品之一的紅豆最中餅，由於紅豆是自己做，甜度沒有過頭，結合鬆脆之最中餅，不錯。
燒菠蘿，從來是最穩陣，又好吃的水果。甜胃也相當滿足了。聖誕，就是要放肆的吧！
沒有留言:
張貼留言