花盃日本料理 - 曾經的名店

食物：$$$1/2
環境：$$$1/2
服務：$$$1/2 

臨時臨急出銅鑼灣，好多食肆都排長龍，要搵地方食飯都唔容易，諗諗下不如走上花盃碰碰運氣。

鐵板燒枱已坐滿，只有和食枱，都無所謂喇，有得食就算，費事再搵了。

雖然去花盃應該食Teppanyaki，但既然坐唔到鐵板燒枱，我就退而求其次，要左個牛肉鍋。老友就堅持吃鐵板燒，總之大家都係些牙食。

食少少清爽既沙律打開胃口，主菜亦隨之送上。

先嚟鐵板燒既鱈魚同埋大蝦，鱈魚皮香肉嫩，蝦肉爽彈，但溫度稍嫌不足，這就是唔坐鐵板燒枱的壞處。

朋友怕唔健康，放棄蝦頭，我就梗係唔執輸。香脆既蝦頭，甘香之蝦羔，人間美味，點可以唔食架！？

跟住我個牛肉鍋也送來了。份量蠻大的，仲跟上味噌湯、茶碗蒸、漬物和米飯。茶碗蒸夠熱夠滑，有雞肉甚至黑松露醬在內，但味道仍是偏淡口。鍋內有唔少片既和牛，和牛唔算入口溶化，不過都幾嫩口，甜甜的湯頭一向討我歡心，所以吸味既豆腐、芋絲、菇、野菜等配料，也變得吸引。

又回去朋友既鐵板燒，牛肉佢只揀左薄燒美國牛。肉質沒有太韌，帶點肉香，包裹著蒜片及蔥花等，惹味可口。

沒有試他的炒飯，不過評價正面，見佢食得一粒米不剩，已經說明一切。

餐後的一小件蛋糕幾有水準，再呷一口香濃咖啡，滿足矣。

十多年前響噹噹既名店，今時今日人氣雖已大不如前，但間中來食一餐，佢都交到功課俾你既。

餐廳資料:
花盃日本料理
銅鑼灣新寧道8號中國太平大廈2期2樓
25779799