2021年2月26日 星期五

欣圖軒 - 解禁



食物:$$$1/2
環保:$$$$
服務:$$$$ 

二人限聚令下,筆者幾乎沒有去過飲茶,畢竟兩條友食唔得幾多嘢,多個人又要搭枱,真係好鬼麻煩。

所以,當禁令一放寬,便馬上找地方一盅兩件。

然而,今時今日搵食真艱難,大家好似放監咁,間間食肆均爆滿,大大話話食了十幾白果,最後才訂到了欣圖軒。

又是一家久違了的中菜廳,洲際酒店進行大翻新之時,這裡成為了孤兒仔,令我差點忘記了呢間星店。

早已習慣了,去邊度飲茶也會點上叉燒,今云亦唔例外。可是,這兒的出品雖尚算鬆化,卻欠缺蜜味,與及肉香,更沒有燶邊位,落筆打三更。

且看各款點心能否挽回分數? 雪山包嚐過唔少,不過十居其九是叉燒包,以香芋及火鴨作餡料的,是首次品嚐。面頭帶微脆的包身,跟粉嫩的芋頭和火鴨絲結合起來,味道唔差既,但又擦唔出咩火花,平平穩穩的一款點心。

金魚餃賣相雖不及晶荷軒的精緻,卻已是很不錯的打卡食品。這樣的做法,皮一定是厚和偏韌。又魚肉又蝦肉又帶子的作餡,是足料的,但味道稍為淡口。都係果句,我寧願食傳統的蝦餃。

之後是比較罕見的點心,三杯汁金蠔盞。曲奇撻皮尚且鬆脆,金蠔亦隻隻飽滿,但汁醬太有特色,不是我杯茶。

再來的明蝦角就做得很好,鬆脆熱辣不在話下,蝦肉爽口,旁邊的一小碟沙律醬,是加入了柚子,所以更為清新。

蟹蓋是招牌菜色,當然要一嚐。份量比想像中大,金黃又漲卜卜確是吸引。

外層酥脆熱辣,絲絲蟹肉相當足料,不過真係幾漏,加點喼汁來伴之,會較為適合。

老實說,點心稱不上頂級水準,但接著來的幾款甜吃,就挽回唔少分數。楊枝甘露是多年來的名物,乾冰做出煙霧效果,仍是影相拍片的最佳之選。頗杰身的出品,勁多芒果肉及西柚肉,保持水準。

香芋蛋白燉鮮奶是另一招牌甜點,蛋白滑溜而頂頭的芋泥香濃,超級好食。奶皇鳳梨芝麻棗,帶有陣陣菠蘿香甜,唯外皮略嫌有欠香脆。

以一杯羅漢果菊花茶作結,舒心!

何時才可以進化至大家坐埋一圍食飯呢? 好似好遙遠咁......


餐廳資料:
欣圖軒
尖沙咀梳士巴利道18號香港洲際酒店地下
23132243



4 則留言: