奇華茶室 - 古典味

食物：$$$

環境：$$$$

服務：$$$$

執屋時，發覺有張奇華的Coupon，贈送冰火菠蘿油或者紅豆冰，月底到期，把握最後機會，去奇華茶室消費左佢。

好衰既我，其實收過好多次奇華既邀請，到其樓上的工作坊玩下整年糕、腊腸卷等等既活動，我均推掉，連帶樓下的茶室我也從沒到訪過，今次算是來見識下。

裝修比預期中雅致，帶點古色古香的味道，就岩時間唔怕曬的話，坐在露台歎杯茶，感覺是挺舒適的。

   

贈送的冰火菠蘿油，牛油是大舊而凍，菠蘿包也夠熱，至少沒有辜負冰火的稱號。頂頂的酥皮做得鬆脆，可惜包身頗韌，影響了整體口感。

菠蘿油外，也點了兩份下午茶餐。炸魚薯條，用碗盛起，感覺優雅，但份量較小，下午茶你咁架喇，我唯有咁同自己講。

是薯角，薯仔味很濃郁，不錯。炸魚亦夠脆夠熱，但味道略淡口，沾點Mayo來吃會較好，不要太執著要落鹽與醋吧~

叉燒撈日本丁，丁麵質感偏腍身，但味道是好的，當然這沒有什麼難度可言。叉燒只得幾片，在沒要求的情況下，是偏瘦的，可幸是仍有肉香。

熱奶茶看色水都知唔夠奶，喝起來的確不滑，而且帶有微微的苦澀味，唔係我杯茶。

連奶茶都苦過人，教我如何苦中作樂？

餐廳資料:

奇華茶室

灣仔皇后大道東188號1樓

21483388