天水圍嘉湖海逸酒店 - 久違了的月光下燒烤

食物：$$$

環境：$$$1/2

服務：$$$1/2

天水圍嘉湖，對好多人嚟講係山旮旯，不過，原來由我家去又不是想像中的遠。幾個站西鐵，轉三個站輕鐵(約5分鐘，西鐵轉車免費)，一落車對面就是酒店，快過過海。

    

快樂星期五，最好就係同朋友大吃大喝，來了這裡吃韓燒。你無聽錯，酒店在三樓的露天位置，做了任飲任食韓燒，還佈置了一個「大月球」，實行在月光下燒烤。這件事，好像只在讀書時期做過，如今又俾機會我呢個老頭回帶。

肚餓了，唔理三七廿一，有乜燒乜。

燒烤需時，先吃些唔使燒既嘢頂下肚先，幾款沙律，同埋酸辣兼備既韓國泡菜，正好打開胃口。

回到燒烤環節，辣牛筋肉、豬腩肉、雞翼、秋刀魚及魷魚，全部已調好味，燒香了已可以，食肉獸定必滿足。

燒雞翼是相對較好的，大隻肉多，我吃了兩隻。朋友將泡菜輕輕燒香，自製出豬腩肉卷，比起單獨吃泡菜或腩肉，好味百倍。

比起肉類，小朋友更喜歡吃迷你竹輪(獅子狗)、紅腸等，這也不難理解，我小時候也很中意食呢啲。

我其實好無耐性燒嘢食，好在這都有些充滿韓國風味的熱食，韓式年糕煙煙韌韌也夠辣，炸雞粒唔怕乾柴柴，還有點辣炒什菜等，整體水準可以接受。

飯桶朋友都唔緊要，海鮮炒飯可以滿足到你。

以任食韓燒去計，呢度既甜品陣容絕不輸蝕，最容易放上網呃Like的應要數到紫薯蛋糕，紫薯都算幾滑幾香。

不過個人更喜歡斑蘭蛋糕，很有水準。其他的如芒果蛋糕、朱古力蛋糕等也不失禮，甜品欄值得一讚。

一百六十八蚊任砌，未嚐不可。

餐廳資料:

嘉湖海逸酒店

天水圍天恩路18號