雄記粉麵 - 病人餐

食物：$$$1/2

環境：$$$

服務：$$$

忽然獲利回吐，嘔到屎屎下，未知是否股市/樓市大趺既先兆？

會唔會係恆指呀，不過淨係隻「柒拎拎」，間間大行話要增持，普遍睇$450樓上，花旗仲睇佢最牛去到$606，有佢撐住，個市無咁易跌得死人既。

定係暗示樓市呢，家陣221呎無房加開放式廚房型格納米單位講緊過千萬，定還是高處未算高呀？地產經紀好鬼樂觀架，手快有手慢冇，再唔買過兩年變益力多架喇，呵呵呵呵～

以上分析純屬個人9up，投資涉及風險，樓宇/股票市價格可升可跌，亂參考地獄黑仔王入市，好自為之。

廢話講完，入番正題，嘔到傻下傻下，翌日基本上沒吃什麼，再隔一天也只敢食粉麵，想起過來雄記這裡來，數數手指，又唔知多少年沒幫襯過。

    

來荃灣呢間名店吃粉麵，魚肉春卷是鐵膽，再看當時心情和口胃去選另一配料，這次就是要春卷墨丸河。

一條魚肉春卷兩粒墨丸的河粉，份量少得連我也吃不飽的，盛惠三十三個大洋，不便宜，但他從來就是這個Size。

墨丸口感唔錯，是足料的。魚肉春卷多年來保持水準，賣相像牛脷酥，身型豐滿。大口咬下去，皮肉沒有分離，質感充滿彈性，不失魚肉香味，真心不錯，難怪能成為名家的名物。

這兒的飲品其實可以跳過，只是這天口淡淡，想飲杯熱檸檬茶而已。

感覺上，阿姐好似沒以前咁寸，可能係我醒醒目目，無阻住地球轉。

餐廳資料:

雄記粉麵

荃灣荃興徑17號C地下