新店速遞：海福樓 - 吃得出的功架

食物：$$$$

環境：$$$1/2

服務：$$$1/2

一些地方，明明住宅林立，商廈毗鄰，仲開埋高級酒店，但地運走完，就是旺不起來。儘管港鐵開埋個新站俾佢，都無咩起色。大家應該知道我講緊既，是黃埔。

到底地運註定一切，還是人定勝天？九號水產的出現，進駐了不少餐廳，就連藝人馬德鐘都選擇在那裡開設蠔吧，似要將黃埔再次活化。

數個月前到訪過九號水產，人流比較稀疏，不過當時很多餐廳仍未投入服務，唔可以作準。

據知那兒近日開設了一家新的粵菜酒家，來頭唔細，由效力福臨門多年的師傅主理，我肯肯定要去會一會佢。

    

一行七人來到，第一件事飲個靚湯，節瓜鱆魚湯，喝得順喉舒服，岩晒平日少湯水既我們。

不知何時何日，叉燒成為了上高級菜館的必吃項目。海福樓既叉燒，看上去是偏瘦，卻入口鬆化，富肉香，幾有水準，但我想佢邊邊位可以有點燶，會仲正。

之後兩款香口嘢，藕餅煎得香口，沒有過咸。百味脆豆腐，薄薄的金黃外衣包裹著嫩滑的豆腐，外脆內嫩口感從來吸引，吃時要小心燙咀吧。

再來便是海鮮系列，個人一向喜歡蒜茸粉絲蒸元貝，在這裡吃，無須懷疑火侯，必然是鮮嫩入味，只想多來一隻。

豉椒炒蟶子亦來得精彩，炒得剛剛好，咬落爽脆，又唔會韌得像吃香口膠，豉椒炒固然是相當惹味，我是吃完一隻又一隻的。

千呼萬喚，主角的皇帝蟹終於出場，這夜我們來個二食。第一道是將蟹腳蒸蛋白，啖啖肉的蟹腳，受歡迎是理所當然，墊底的蛋白滑溜之餘，更盡是蟹的鮮味，絕非先蒸熟再放蟹腳上面的貪方便做法。

第二食，將蟹肉跟南瓜忌廉焗飯，出來時候香噴噴，吃起來沒想像中的漏，可口，不過我還要留肚呢～

接著的水煮魚，並不是正宗的四川風味，但打開煲蓋之時，香氣四溢，深知是高水準之作。採用龍躉片，口感自當彈牙，辣度唔算強，麻香更吸引，而且真的是勁香，底下的粉絲索晒味，是你我他都懂的精華。

炸子雞，色水已話你知係好東西，挑件背脊吃，雞皮脆卜卜，肉質好嫩滑，唔會過咸，又是佳品。

甜品之前整多個羊腩煲，豐厚的皮跟鬆化的肉，完全夠晒時間。枝竹與生菜，是羊腩的好朋友。

咁高水準的菜色，深信甜點一定唔會失禮，再飽都要食。蛋黃千層糕，愈來愈少地方能嚐到，要懷緬一番。豆沙蘋葉角是是福臨門既名物，這裡雖用竹葉，但相信仍會好吃。的確，熱得燙口的出品，糯米軟腴不黏牙，豆沙香甜，一絕的出品。

餐廳資料:

海福樓

紅磡德豐街8號黃埔新天地第九期地下九號水產9號舖

3169 0880