愛民茶餐廳 - 珍惜舊式茶記

食物：$$$1/2

環境：$$$1/2

服務：$$$$

農曆新年那幾天，除去酒店中菜廳飲茶外，日日就是Let eat糕，年糕蘿蔔糕芋頭糕馬蹄糕…

食得Robert Go多，好想嘆番份茶記的菠蘿油和奶茶，填補一下心靈上的空虛。

我長大的長沙灣區，當然有不少茶餐廳選擇，新華定係金園好呢？

忽發奇想，趁假期最後一天，不如試試搭地鐵去何文田(對！我是慢人九拍，仍未到訪過何文田站)，睇下舊式屋村有無邊間茶記合心水。

　　　

 

一嘢便揀定了，要去愛民茶餐廳，別無他選。

五點四十分入去，店內在做清潔，只剩兩枱客人，好像已經打烊。正當我左顧右盼，睇緊是否仍做生意之時，侍應叔叔有禮地請我入去坐。

問店員還有無菠蘿油，對方友善地回覆是有，完全沒有半點黑面，雖然我深知道，我是在阻住地球轉。

未幾，菠蘿油送上，咬下去香甜酥軟，夾著大件牛油夠邪惡，只是，菠蘿包是凍的，欠缺了冰火效果。如果可以烘番熱，就是極品。

熱奶茶茶香味濃，入口幼滑，舊式屋村的茶記之奶茶，總會合我心水，並不是偏心。

好了，六點前應該要離開了，阻人收工猶如殺人父母，要識趣吧！

要好好珍惜呢類舊式茶記。

餐廳資料:
愛民茶餐廳
何文田愛民村昭民樓地下7至8號
27140222