嘉樂冰廳 - 巨蛋

食物：$$$1/2
環境：$$$
服務：$$$1/2

話時話，又有幾年沒到訪荃灣的嘉樂冰廳。冇計啦，餐餐都大排長龍，令人卻步。我唔會排半粒鐘去食茶記囉。

氣溫下降至個位數字，加上非繁忙時間，人客變得相對少。筆者一個人，很幸運地，一秒都唔使等，便找到位置，似乎開始行運。

吃什麼，大概己心中有數，只循例瞄一瞄個餐牌，便可以落單。

 

超難得不用排

落柯打後，慢慢的等，四周看看人生百態。有熟客跟老闆娘吹水，講生活慘況；有人呻緊工作有幾辛苦、工時長，老婆唔肯同佢生，話生左無人照顧；有個阿伯帶個幾歲小朋友食嘢，但嗰個唔係佢既孫，而係佢個仔。總之一切皆是十分畸型。香港地，原來不知不覺間，變得悲慘。
 

太薄身

飲品率先送到，我的熱奶茶，感覺就是偏薄身，不是我杯茶。若天氣不是那麼寒，我大概會要杯凍飲。但，大氣不似預期，已是常識了吧！
 

稍油

蛋牛治制作依舊需時頗長，先來的，是炸雲吞。一碟十粒，即叫即炸，肯定香脆熱辣，蝦肉都爽，沾上酸酸甜甜的汁醬，醒胃。要挑剔的是，稍為油膩。
 

巨

待我完成十粒的雲吞，鮮牛肉蛋治亦奉上，時間岩岩好。雞蛋依舊的大得誇張，鄰檯的客人笑說手工粗糙，三文治凸起晒。烘底的麵包咬落微脆，鮮牛嫩口，蛋是多，卻有欠蛋香，總之跟全盛時期的出品，是有點距離。

筆者聽見人人走時，也會說句：「飽到好頂」。

我，完全同意。

 

 

餐廳資料:

嘉樂冰廳

荃灣新村街40B號地下

2493 7308