鹿悅日本餐廳 - 開年飯

食物：$$$1/2
環境：$$$$
服務：$$$1/2

每年的大年初二，都會帶兩老去酒店中菜廳/星級酒家吃餐好的開年飯，祈願來年豐衣足食。

去年老豆痛風發作未能出門，兩人吃中菜又比較難叫餸，所以就同老媽子去左食壽喜燒，幸而佢都好滿意。

今年，兩老話可以轉下口味，食日本餐或者中菜都無妨，我即時選左幾間俾佢哋揀，有中也有西。

最終選了Grand Hyatt的日本餐廳鹿悅，皆因我哋都幾中意酒店大堂每年的新年佈置，適逢初二酒店亦有舞獅，睇完之後再吃午餐，正好。

除左揀選主菜之外，原來伴菜也可以自己話事，我挑的是「雛月」，包時令前菜、太卷壽司、牛肉薯仔煮物以及麵豉湯，最後當然還有甜點。

太卷其實包得唔算靚仔，但味道尚可。炆牛肉蘿蔔有夠腍身，麵豉湯唔會太咸太搶喉，總算交到功課。

主食方面，老豆吃得西京燒銀鱈魚非常厚身，肉質比坊間嚐到的更為結實，油脂香十足，吃魏滿意。

特選什錦壽司就有十件壽司加上迷你的海膽小杯，感覺豐盛。然而，壽司大多是以白身魚為主，對於喜愛油脂爆棚的老媽子而言，是有點不爽。

鮮味十足的海膽魚籽小杯，尚且可以挽回一些分數。

我既和牛野菜蕎麥麵，用上A3的九州和牛，大大片都夠腍身，倒是可以。

甜品可以要雪糕或者蛋糕，栗子蛋糕我覺得偏甜，清爽的檸檬雪葩，就正好消消滯。

畢竟是五星級酒店的日本餐廳，環境是舒適的，當日食客亦不多，靜靜地慢慢嘆個豐盛午餐作開年飯，其實也不錯丫~

餐廳資料:
鹿悅日本餐廳
灣仔港灣道1號君悅酒店閣樓
25847722