蓉城見面 - 成都滋味

食物：$$$1/2
環境：$$$1/2
服務：$$$$

朋友忽然辣癮起，想食餐雞煲，無問題，我即刻搵！

其實，腦海中已浮現出一間新店的名字，叫蓉城見面，主打四川雞煲烤魚及冒菜。既然大家都未試過又有興趣，馬上成行。

地方比想像中大，而且全部都係卡位，坐得幾舒服。

先來雞煲 ，據知份量好大，三人行要半隻就好。沒多久，雞煲上桌，放左電磁爐上一陣，香氣撲鼻，份量的確幾巨。雞肉估佢唔到咁嫩滑，仲有窩筍在內，愈吃愈滋味。

將雞件吃光，加湯，就是打邊邊時間。由於仍想吃冒菜及其他小食，只點了窩筍及午餐肉來作配料，兩款都是吃麻辣鍋的最好朋友，尤其是午餐肉，每次吃麻辣鍋都少不了此品，邪惡但無比暢快。

之後也來份冒菜，所謂的四川冒菜，即是將各式各樣的食材放入滾湯之中，大概可理解為一個人的火鍋。今次揀既配料，係血旺肥腸，前者煙韌，肥腸已去掉中芯的肥脂，有大腸的味道但不羶，愛吃內臟的朋友自會明白，是好東西來的。正如朋友所指，係有靈魂既味道。再者，呢個血旺肥腸的湯底，淥剛才的午餐肉及窩筍，又是另一番滋味。

四川小吃之中，個人特別鍾情於蒜泥白肉，呢度出品夠惹味，而且每件都夾有青瓜片，多一份清新感覺。

另外的川北涼粉，味道不俗，但比較易斷，吃得唔夠過癮。

紅糖糍粑吃過唔少，但多半都是在外淋上紅糖漿，流心的紅糖是比較少見。

成品十分乾身，完全沒油膩感，紅糖做到流心效果，自然更加吸引。

餐廳資料:
蓉城見面
尖沙咀金巴利道35號金巴利中心地庫A號舖
28930318