食物：$$$$
環境：$$$$
服務：$$$$
轉眼間，又到左778生日飯的第一回，大家夾好日子，就要決定食乜嘢。
與其自己傷腦筋，不如將個波交俾AI ?
AI 建議我哋去香港公園裡面的Pondside，坐擁瀑布池景，綠樹環繞，是間靚景餐廳。
我份人比較武斷，對這類餐廳從不抱太大期望，但既要玩得呢個遊戲，便遵守遊戲規則，相信AI。
店子週末做緊半自助餐，出去兜個圈瞄瞄，自助餐桌啲嘢食又幾精緻喎！沙律、冷盤及Cold Cut，賣相與味道均不輸酒店。芝士有軟又有硬，平易近人以至性格剛烈的款式都可以搵到，幾有驚喜。
凍海鮮款式唔算多 (根本無expect佢有添啦)，但青口、海蝦及翡翠螺都十分鮮甜。熱葷之中，第一眼看中了日式餃子，其實佢仲有大板燒及章魚小丸子等日系美食，而且不時換款，今時今日好多酒店都做唔到咁。其他的熱食選擇稱不上相當豐富，畢竟佢只係半自助餐，仲有主食架嘛。但如芝士焗扇貝等，都好食的。幾款主食，其一有青口意大利麵，麵條口感有嚼勁，惹味好吃。雞扒相信是慢煮，雖然厚身，入口仍十分嫩滑，裡頭釀了些南瓜茸，旁邊還有些粟米茸、串茄及牛蒡等作點綴，誠意之作。西京燒銀鱈魚又係好厚身，仍能保持嫩滑，有油香，個人覺得調味可以重手少少。甜品時間，見有我喜歡的葡撻，自然唔執輸。味道是不錯的，如果趁熱時可以食到就更好，溫度方面餐廳可以考慮下。其他的甜點都是以蛋糕為主，拿破崙最為吸引，栗子撻、提拉米蘇及熱情果芝士餅等都交到功課。
講多少少，逢週末及假日都有插畫師駐場，大家只要俾$100，即可獲即繪人像畫一幅，餐廳會將全數款項捐俾兒童癌症基金，好有意義。有靚畫，又可以做善事，大家不妨支持下。
你張人像畫呢？
回覆刪除