食物：$$$$
環境：$$$$
服務：$$$$
可以話，Conrad既自助餐是重質不重量，嘢食精緻，味道出色。今期做緊意式主題，正正是意籍主廚Riccardo Cararsi的強項。
風乾火腿及芝士的經典美食當然不可或缺，巴馬火腿、莎樂美腸、Coppa，以至加入煙燻效果的Peck，咸香好吃，跟芝士也是非常合拍。而芝士，意籍主廚也顯得十分講究，單是水牛芝士，都弄出Burrata、配番茄、煙燻，同埋芝士波等，當然仲有其他各式的軟硬芝士，這夜我的求芝慾也特別強。
意式主題也特別著重沙律菜，所以款式唔少，井然有序擺得好吸引，Carpaccio 、劍魚他他等傳統風味固然穩陣，重點推介金菜頭沙律，比起常吃慣的紅菜頭更為精彩。不難想像，意粉和燴飯會是實而不華之作，貝殼麵、粗管麵、薯仔糰子，充滿芝味的燴飯等，結合不同的配料，相當吸引，在坊間自助餐桌上難以找到，畢竟真係要有個意大利主廚係度，先會咁講究。薄餅每晚輪流供應五至六款，每款都配料豐富，口感十足。是日嚐到的薄餅，辣肉腸最有驚喜，走羅馬風，長方型手切薄餅，比起拿波里款式，別有一番滋味。
肉類方面，既可在此找到自助餐必備的燒牛肉，甚至有充滿Tuscany風情的烤豬，後外皮酥脆，肉質鮮嫩多汁，妙不可言。每人一份的利佛諾燉海鮮，是主廚家鄉做法，把煎香過的波士頓龍蝦、青口及八爪魚放入大鍋中，再加入番茄、紅酒、橄欖油、鼠尾草、乾紅椒及蒜蓉同煮，海鮮香氣撲鼻，湯頭是濃縮版的精華，龍蝦肉也比預期中更為細嫩。
差點走漏了室外的燒烤，好在店員提一提。即燒的風味絕對有分加，席上朋友是菠蘿fans，一人來半碟燒菠蘿無難度。其他的款式，如羊架、大蝦及粟米等，每樣來一點，已夠滿足。
平時吃自助餐，細食既我多半會放棄湯水，不過呢度個櫛瓜椰菜湯，是喝得令人想encore的級數。飲埋呢配湯，係時候甜品環節。坦白說，甜品款式未算十分豐富，然而全都是有水準的意式作品，如括沙巴翁配意式脆餅、開心果奶酪卷，以及朱古力忌廉泡芙，完完全全地俘虜了我的甜胃。意式甜點，當然離不開提拉米蘇，店員會捧著一大兜過來，在食客跟前即場「筆」俾大家，好意大利家庭式既做法，我欣賞。
最後整多杯Movenpick雪糕，這夜，我滿足了！
兜tiramisu睇落好得，係鍾意嘅濕濕地嗰隻😋
回覆刪除